काठमाडौं – अनमोल केसी स्टारर फिल्म ‘छड्के २.०’को टिजर सार्वजनिक भएको छ । एक मिनेट ४५ सेकेण्ड लामो टिजर अनुसार फिल्मको केन्द्रीय कथावस्तु रोयल मनाङ ग्याङ, बारुलाज ग्याङ र ग्रीन ग्याङको लडाइँको कथामा घुम्ने देखिएको छ ।
ग्याङस्टर मनोविज्ञान सिर्जना गर्ने टिजरको ब्याकग्राउड स्कोर र रङ संयोजन । मनाङमा छायांकन गरिएको फिल्मको टिजरमा मेनडग चरित्रमा देखिएका अनमोलले फिल्ममा ग्रीन ग्याङको प्रतिनिधित्व गरेको देखिन्छ ।
टिजरमा रविन तामाङ साम्तेन, निगम श्रेष्ठ खजुरे, रेशा आले मगर यांकीको चरित्रमा देखिएका छन् । निर्देशक समेत रहेका श्रेष्ठ पनि फिल्मको प्रमुख चरित्रमा देखिएका छन् । दश वर्षअघि बनेको फिल्म ‘छड्के’को सिक्वेलको रुपमा यो निर्माण भए पनि कथावस्तु भिन्न देखिन्छ । फिल्म फागुन १९ गते रिलिज हुँदैछ ।
