काठमाडौंमा आज र भोलि भेरोसेल खोप लगाइँदै

काठमाडौंमा आज र भोलि भेरोसेल खोप लगाइँदै
सोमवार, जेष्ठ ३१, २०७८

काठमाडौं । काठमाडौं महानगरपालिकाले खोप अभावमा स्थगित गरेको कोभिड–१९ विरुद्धको खोप कार्यक्रम फेरि सञ्चालन गर्ने भएको छ ।

काठमाडौं महानगरपालिकाको शहरी स्वास्थ्य तथा खाद्य पदार्थ नियमन विभाग प्रमुख हरिबहादुर कुँवरले जिल्ला स्वास्थ्य कार्यालय काठमाडौंले भेरोसेल खोपको पहिलो मात्रा लगाउन छुटेका ६० देखि ६१ वर्ष उमेर समूहका जेष्ठ नगारिकलाई खोप कार्यक्रम सञ्चालन गर्न परिपत्र भएबमोजिम खोप कार्यक्रम सञ्चालन हुन लागेको हो ।

काठमाडौंस्थित वीर अस्पताल, शिक्षण अस्पताल, वीरेन्द्र सैनिक अस्पताल र निजामती कर्मचारी अस्पतालमा आज र भोलि भेरोसेल खोप लगाइने छ ।

जेठ २५ गतेबाट काठमाडौं उपत्यकासहित देशभर भेरोसेल खोपको पहिलो मात्रा लगाउने अभिायन सुरु भएको थियो । तर खोप अभावमा काठमाडौं महानगरपालिकाले दुई दिन अघि नै खोप कार्यक्रम स्थगित गरेको थियो ।

महानगरले आइतबार जारी गरेको सूचना अनुसार पहिलो डोज लगाउन छुटेका ६० देखि ६१ वर्ष उमेर समूहका जेष्ठ नागरिक, यसअघि भेरोसेल खोपको पहिलो मात्रा लगाएका व्यक्ति, स्वास्थ्यकर्मी, कोभिड–१९ बिरामीको प्रत्यक्ष जाँच, उपचार र हेरचाहमा संलग्न चिकित्सक, नर्सिङ र प्यारामेडिक्स विद्यार्थी स्वास्थ्यकर्मीलाई खोप लगाउन अनुरोध गरेको छ । खोप कार्यक्रम बिहान १० बजेदेखि अपराह्न ४ बजेसम्म सञ्चालन हुनेछ ।