काठमाडौं उपत्यकामा निषेधाज्ञा १० दिन थप, लामो दूरीका यातायात चल्ने

काठमाडौं उपत्यकामा निषेधाज्ञा १० दिन थप, लामो दूरीका यातायात चल्ने
बिहिबार, असार ३१, २०७८

काठमाडौं । काठमाडौं उपत्यकामा साउन १० गतेसम्मका लागि निषेधाज्ञा थप गरिएको छ ।

पछिल्लो पटक थपिएको निषेधाज्ञा आज रातिदेखि सकिंदैछ । आज काठमाडौं उपत्यकाका प्रमुख जिल्ला अधिकारीहरुको बैठकले निषेधाज्ञा साउन १० गतेसम्म लम्ब्याउने निर्णय गरेको काठमाडौं जिल्लाका प्रमुख जिल्ला अधिकारी काली प्रसाद पराजुलीले बताए । उनले अत्यावश्यक कामले उपत्यका प्रवेश गर्ने सार्वजनिक तथा नीजि सवारी साधनलाई आवत् जावत् गर्न दिइने जानकारी दिए ।

यसकासाथै लामो तथा मध्यम दुरीका सार्वजनिक यातायात सञ्चालन गर्नका लागि सिसिएमसीलाई सिफारिस गरिएको पनि उनले बताए ।

उपत्यकामा सभा, समारोह गर्न अझै पनि रोक लगाइएको छ । त्यस्तै पार्टी प्यालेस, डान्स बार, नाचघर, स्वीमिङ पुल, शैलुन, ब्युटी पार्लर, हेल्थ क्लव, फुटसल, जिमखाना, शैक्षिक संस्थाहरु भने अझै बन्द रहने प्रमुख जिल्ला अधिकारी पराजुलीले बताउनुभयो । उपत्यकामा पसलहरु बेलुकी ७ बजेसम्म खोल्न दिइने निर्णय पनि गरिएको छ ।