छानविन समितिको प्रतिवेदन देउवालाई, क्रियाशील सदस्यता विवाद कांग्रेसले पाँच दिनभित्र टुंग्याउने

छानविन समितिको प्रतिवेदन देउवालाई, क्रियाशील सदस्यता विवाद कांग्रेसले पाँच दिनभित्र टुंग्याउने
बिहिबार, साउन १४, २०७८

काठमाडौँ– नेपाली कांग्रेसको क्रियाशील सदस्यता छानविन समितीले केही जिल्लाको विवाद यथावत राखेर पार्टी सभापति शेरबहादुर देउवालाइ प्रतिवेदन बुझाएको छ ।

बिहीबार देउवाको निजी निवास बुढानिलकण्ठमा बसेको पदाधिकारी बैठकमा समितिका संयोजक रमेश लेखकले विभिन्न ६ जिल्लाको विवाद यथावत राखेर प्रतिवेदन बुझाएका हुन् ।

क्रियाशील सदस्यता विवाद सल्ट्याएर प्रतिवेदन बुझाउन बिहीबारसम्मको समय प्रदान गरिएकोमा समितिले केही त्रुटि सच्चाएर प्रतिवेदन बुझाएको हो ।

सप्तरी, बारा, धनुषा, सर्लाही–२, सिन्धुपाल्चोक र रसुवाबारे विवाद कायमै रहेको नेताले जनाएका छन् ।

छानविन समितिका संयोजक रमेश लेखकले प्रतिवेदन पार्टीमा बुझाइएको र अब विवादका विषयहरु नेताहरुकै तहबाट छलफल गरेर समाधान गर्ने निर्णय बैठकले गरेको जानकारी दिए ।

उनले ५ दिन भित्र विवाद समाधान गर्ने प्रतिवद्धता नेताले जनाएको बताए । लेखकले तोकिएको समयमा नै महाधिवेशन गर्न पार्टी गम्भीर भएर छलफलमा लागेको उल्लेख गरे ।

त्यस्तै कांग्रेस नेता प्रदीप पौडेलले ४ प्रतिशत बाँकी काम रहेको र यसले महाधिवेशन प्रभावित नहुने बताए । अब निर्वाचन समितिले काम छिटो गरेमा तोकिएको समयमै महाधिवेशन हुने उनले बताए ।

अरु पार्टीबाट समायोजनामा आएका र केही जिल्ला तथा निर्वाचन क्षेत्रमा देखिएका समस्या समाधान गर्न बाँकी रहेको नेताहरुले बताएका छन् । क्रियाशील सदस्यता विवादकै कारण कांग्रेसको तल्लो तहको अधिवेशन नै प्रभावित भएको छ । जसका कारण तोकिएको समयमा महाधिवेशन हुनेमा आंशका पैदा भएको छ ।