Thu May 26 2022
देश

ओलीसँगको एकताबाट धेरै ज्ञान सिकेको छु, त्यो ज्ञान माधव नेपाललाई पनि काम लाग्छः प्रचण्ड

काठमाडौं । नेकपा माओवादी केन्द्रका अध्यक्ष प्रचण्डले एमाले अध्यक्ष केपी शर्मा ओलीले भ्रष्टाचार गर्दिनँ भन्नेले त्यसको ठिक विपरित कार्य गरेको आरोप लगाएका छन् ।

शनिबार वाईसीएल नेपालको राष्ट्रिय कार्यकर्ता भेलालाई सम्बोधन गर्दै अध्यक्ष प्रचण्डले एउटा भन्ने र अर्कै गर्ने नेता भएको आरोप लगाएका हुन् । भ्रष्टाचार गर्ने मान्छेलाई देख्न पनि चाहन्नँ भन्ने ओलीको भाषामात्रै रहेको अध्यक्ष प्रचण्डको आरोप छ ।

यस्तै प्रचण्डले पार्टी एकता ओलीले प्रधानमन्त्री बन्नका लागि ठगी धन्दा मात्रै चलाएको पुष्टि भएको आरोप समेत लगाएका छन् । गठबन्धनको बैठकमा केपीसँग एकता गरेर के पाउनुभयो भन्ने प्रश्न नेताहरुले गरेकोमा आफू नाजवाफ भएको उनको भनाइ थियो ।

‘केपी ओलीमा भन्ने एउटा गर्ने अर्कै प्रवृत्ति छ, म भ्रष्टाचार गर्दिनँ, गर्न पनि दिन्नँ रे । भ्रष्टाचार गर्ने मान्छेलाई देख्न पनि चाहन्नँ भन्ने भाषामात्रै रहेछ । कतिपय साथीले एकता गर्नु नै बेकार रहेछ पनि भन्नुहुन्छ, तर एकता गर्नुपर्थ्यो, विधान र राजनीतिक प्रतिवेदनमा अहिलेको राजनीतिक परिवर्तनमा माओवादी आन्दोलनलाई निर्णायक भूमिका खेल्यो भन्नेमा केपीले सही गरेका छन् । अध्यक्ष र प्रम पालोपालो बन्ने भन्नेमा सही गरेको छ । तर प्रम प्राप्त गर्नका लागि केपीको सबै ठगी धन्दा रहेछ । केपीसँग एकता गरेर ठूलो ज्ञान प्राप्त गरेर आएको छु, त्यो ज्ञान काँग्रेसलाई काम लाग्छ, माधवजीलाई पनि काम लाग्छ ।’ प्रचण्डको भनाइ छ ।

उनले आफूहरु घ्यूभन्दा नरम रहेको तर अत्याचार भयो भने विद्रोह गर्ने पनि आफूहरु नै भएको बताए । प्रधानमन्त्री बन्नका लागि केपीको सबै ठगी धन्दा गरेको बताएका छन् । ओलीसँगको एकताबाट धेरै ज्ञान सिकेकाले त्यो ज्ञान माधव नेपाललाई पनि काम लाग्ने बताएका छन् ।