Mon Jan 17 2022
मुख्य खबर

बालबालिकालाई खोपसँगै आँखा परीक्षण

अब पाँच वर्षमुनिका बालबालिकाका लागि खोपसँगै आँखाको परीक्षणसमेत हुने भएको छ । पहिलो चरणमा इटहरी नगरपालिकाबाट बालबालिका आँखा परीक्षण कार्यक्रम सुरु हुने भएको छ ।
खोप लगाउने उमेर समूहका बालबालिकाका लागि आँखा परीक्षण गर्न ‘बालबालिका कार्यक्रम राष्ट्रिय पाठ्यक्रम’समेत तय हुने भएको छ । खोप केन्द्रमा खोप लगाउन जाने बालबालिकाको खोपसँगै आँखा पनि नियमित परीक्षण गर्ने गरी पाठ्यक्रम तयार भइरहेको छ ।

स्वास्थ्य तथा जनसङ्ख्या मन्त्रालय राष्ट्रिय तालिम केन्द्रको सहकार्यमा ग्लोबल आई हेल्थ र इटहरी उपमहानगरपालिकाको संयुक्त पहलमा सो पाठ्यक्रम तयार गर्न लागिएको हो । कार्यक्रममा ग्लोबल आई हेल्थका प्रमुख डा। बेन लिम्बूले खोप लगाउने बालबालिकाका लागि पाठ्यक्रमको तयारी अन्तिम अवस्थामा पुगेको बताउनुभयो । उहाँले दुई वर्षभित्र प्रदेश १ भर यो कार्यक्रम पु¥याइसक्ने जानकारी पनि दिनुभयो । नेपाल सरकारको राष्ट्रिय खोप कार्यक्रम सञ्चालन गर्ने स्वास्थ्यकर्मीलाई नै तालिम दिएर समुदायमा रहेका बालबालिकाको आँखा प्रारम्भिक परीक्षण गराउने गरी पाठ्यक्रममा राखिएको छ ।

स्वास्थ्यकर्मीले आँखा परीक्षण (स्क्रिनिङ) गरेपछि सम्भावित आँखाको जाँच गराउनुपर्ने भएमा अभिभावकलाई विशेषज्ञ चिकित्सककहाँ पठाउन सल्लाह दिनेछन् । नेपाल सरकारले बालबालिका स्कुल भर्ना हुनुअघि अनिवार्य आँखा जाँच गर्नुपर्ने नीति लिएको छ । नेपालमा पाँच वर्षमुनिका बालबालिकामा मोतीबिन्दु, जलबिन्दु, रेटिनोपेथी अफ प्रिमेच्युरेटी र कुपोषणले गर्दा आँखामा हुने समस्या धेरै छन् । त्यसैगरी दृष्टिदोष र अल्छी आँखा न्यून दृष्टिको मुख्य कारक रहेको छ । आँखारोग विशेषज्ञ प्राडा ओमकृष्ण मल्लले बालबालिकामा रहेको आँखाको समस्या सानै उमेरमा हल गर्न नसकेपछि त्यसलाई उपचार गर्न कठिन हुने बताउनुभयो ।

अप्थोमोलोजी सोसाइटीका अध्यक्ष डा। रोहित सैँजूले बच्चाको उमेरसँगै न्यून दृष्टि वा दृष्टिविहीन हुन सक्ने भएकाले सरकारको सहयोगमा हुने यो कार्यक्रम प्रभावकारी हुने बताउनुभयो । नेपाल नेत्रज्योति सङ्घका अध्यक्ष प्राडा चेतराज पन्तले स्वास्थ्य क्षेत्रमा सफल भएको क्षेत्र आँखा स्वास्थ्य मात्र रहेको बताउनुभयो । उहाँले आँखा क्षेत्रमा नेपाल विश्वमै छुट्टै पहिचान बनाउन सफल भएको बताउनुभयो ।

आजको गोरखापत्र दैनिकमा समाचार छ ।