Sun Jan 16 2022
देश

सेती नदीमा आएको बाढीमा ६० जना फसे, वर्षा नरोकिएका कारण उद्धारमा समस्या

धनगढी । निरन्तर परेको अविरल वर्षासँगै सेती नदीमा आएको बाढीमा १० परिवारका ६० जना फसेका छन् ।

बैतडीको सिगास गाउँपालिका–५ को ढुङ्गाडमा बाढीका कारण १० परिवारका करीब ६० जना फसेका हुन् ।

सोमबार राति आएको बाढीले सेती नदी छेउकै बस्तीमा बस्दै आएका ६० जना फसेको वडाध्यक्ष रामबहादुर धामीले जानकारी दिए ।

‘बाढीले सेती नदीको छेउमा रहेको खेतबारी बगाउँदै अग्लो भागमा रहेको बस्तीलाई समेत कटान गरेर दुई भाग बनाएको छ ।

नदी दुवैतिर बग्दा उनीहरु टापुमै अड्किएका हुन् । बैतडी र डोटीलाई जोड्ने ढुङ्गाडको झोलुङ्गे पुल पनि बगाउँदा उद्धारमा कठिनाइ भइरहेको वडाध्यक्ष धामीले जानकारी दिए ।

सेतीको बाढीमा फसेका स्थानीयहरुको उद्धार गर्न प्रदेश सरकार र संघीय सरकारलाई समेत आग्रह गरिरहेको बताउँदै वडाध्यक्ष धामीले बताए । प्रतिकूल मौसमका कारण उद्धारमा थप समस्या भइरहेको बताए ।

उनका अनुसार ढुङ्गाडस्थित सेती नदीको किनारमा करीब एक सय २० परिवार बस्दै आएका छन् ।

उनीहरुमध्ये नदीले कटान गरिरहेको थाहा पाएकाहरु राति नै त्यहाँबाट भाग्न सफल भएका छन् । उनीहरुलाई स्थानीय शारदा माध्यमिक विद्यालयमा राखिएको वडाध्यक्ष धामीले जानकारी दिए ।