Thu Aug 18 2022
मुख्य खबर

प्रधानमन्त्री देउवाले आज कैलाली र बर्दियाका बाढीपहिरो प्रभावितलाई भेट्ने

काठमाडौँ – बाढी-पहिरो प्रभावित क्षेत्रको निरीक्षण गर्न हिजो (बिहीबार) सुदूरपश्चिम पुगेका प्रधानमन्त्री शेरबहादुर देउवाले आज (शुक्रबार) कैलाली र बर्दियाका प्रभावितलाई भेट्ने भएका छन् ।

बिहीबार डोटी, बैतडी, बझाङ र डढेल्धुरा हुँदै साँझ कञ्चनपुर पुगेर त्यहाँ भएको क्षतिको अवलोकन गरेका प्रधानमन्त्री देउवाले आज कैलाली र बर्दियाका प्रभावितलाई भेट्ने कार्यक्रम रहेको उनका स्वकीय सचिव भानु देउवाले जानकारी दिएका छन्।

काठमाडौंबाट कर्णाली प्रदेशको राजधानीसमेत रहेको सुर्खेत पुगेको प्रधानमन्त्री देउवा नेतृत्वको टोलीले आफ्नो गृह प्रदेशमै धेरै समय बिताएका हुन्। उनी त्यही क्षेत्रमा नै बास बसेका थिए। भ्रमण तालिका हेर्दा उनको प्राथमिकतामा कर्णाली प्रदेश परेको देखिएन ।

त्यस क्षेत्रको निरीक्षण सकेर देउवा नेतृत्वको टोली आजै दिउँसो ४ बजे काठमाडौं फर्किने कार्यक्रम छ। टोलीमा प्रधानमन्त्री देउवासँगै अर्थमन्त्री जनार्दन शर्मा, संस्कृति, पर्यटन तथा नागरिक उड्डयनमन्त्री प्रेम आले, कांग्रेसका केन्द्रीय सदस्यहरू एनपी साउद, रमेश लेखक र वीरबहादुर बलायर छन्।