Thu Jun 30 2022
मनोरञ्जन

फलोअर्सको चाहना पुरा गर्दा अस्ताइन् माओ

बेइजिङ (अमरउजाला)– आजकल चर्चामा आउनका लागि मानिसहरु जुनसुकै हतकण्डा अपनाउन तयार छन् । खासगरी सामाजिक सञ्जालमा तिब्र रुपमा भाइरल भइरहेका युवाहरु आफ्नो फलोअर्सको संख्या बढाउन जे पनि गर्न तयार हुन्छन् ।

यस्तै एक घटना चीनमा भएको छ । चीनकी लोकप्रिय सामाजिक सञ्जाल प्रवर्द्धक लुओ शाओ माओ माओजीले फलोअर्सको कुरा मान्दा ज्यान गुमाउनु परेको छ । सामाजिक सञ्जालमा लाइभ स्ट्रिमिङको समयमा शाओले किरा मार्ने औषधी सेवन गर्दा उनको निधन भएको हो । उनलाई फलोअर्सले औषधि खान उकासेका थिए ।

औषधि सेवन गरेको केही समयमा नै शाओको स्वास्थ्यमा समस्या आएको थियो । उनले आफैं एम्बुलेन्सलाई फोन गरेर बोलाएकी थिइन् । एम्बुलेन्सबाट उनी अस्पताल पुगे पनि उनका लागि त्यो समय ढिला भइसकेको थियो । डाक्टरले अथक प्रयास गरे पनि माओलाई बचाउन सकेनन् ।

उनले आफ्नो अन्तिम भिडियोमा फलोअर्सलाई ‘सायद यो मेरो अन्तिम भिडियो हो, किनकी म लामो समयदेखि डिप्रेसनबाट पीडित छु’, भनेकी थिइन् । माओको डाउयिन नामक सामाजिक सञ्जाल प्लेटफर्मममा ६७ हजारभन्दा बढी फलोअर्स छन् । यो घटना अक्टोबर १४ मा भएको हो । माओका एक साथीका अनुसार उनी आफ्नो प्रेमीका कारण तनावमा थिइन् । उनको उद्देश्य औषधि सेवन गरेर ज्यान गुमाउने थिएन । उनी केवल आफ्नो प्रेमीलाई ध्यानाकर्षण गर्न चाहन्थिइन् ।