Wed Jan 19 2022
देश

डोल्पामा जिप दुर्घटना हुँदा नौ जना घाइते

डोल्पा । हिमाली जिल्ला डोल्पामा जिप दुर्घटना हुँदा नौ जना घाइते भएका छन् ।

आइतबार दिउँसो ३ बजेतिर जिप स्टेरिङ फेल भई दुर्घटना भएको प्रदेश प्रहरी कार्यालय कर्णाली प्रदेशले जनाएको छ ।

ठुलीभेरी नगरपालिका –९ भित्तिमा दुनै बजारबाट त्रिपुरा सुन्दरी नगरपालिका–१ सुपानेतर्फ जाँदै गरेको भे १ ज ९७५ नम्बरको जिप दुर्घटना भएको हो ।

जिप सडकबाट अन्दाजी १५ मिटर तल खसेको प्रदेश प्रहरी कार्यालयका प्रवक्ता प्रहरी उपरीक्षक माधवप्रसाद श्रेष्ठले जानकारी दिएका छन् ।

घाइते हुनेमा मकवानपुर जिल्ला हेटौंडा नगरपालिका –९ बस्ने वर्ष ३८ का बिष्णु श्रेष्ठ, वर्ष ३८ का अशोक सारुमगर, वर्ष २२ का बुद्धबीर लामा, वर्ष ३९ का सुरेश श्रेष्ठ, वर्ष ३८ का रमेश गौतम रहेका छन् ।

यस्तै सोही नगरपालिका–१० बस्ने वर्ष ३६ को सुशीलराज गिरी, ९ बस्ने वर्ष ३१ का जीवन शर्मा, ७ बस्ने वर्ष ३८ का किरण अधिकारी र डोल्पाको ठुलीभेरी नगरपालिका ९ बस्ने वर्ष २० का चालक जुनकोष शाही रहेका छन् ।

घर्तीकाअनुसार घाइते तीन जनाको अवस्था गम्भिर र अन्य ६ जनाको अवस्था सामान्य रहेको प्रहरीले जानएको छ । घाइतेहरुको उपचारका लागि जिल्ला अस्पताल दुनै पठाइएको छ ।