Wed Jan 19 2022
खेलकुद

न्युजिल्यान्ड र नामिबियाबीच प्रतिस्पर्धा हुँदै

एजेन्सी – आइसिसी टि२० विश्वकप २०२१ मा सुपर १२ को खेलमा न्युजिल्यान्डले नामिबियासँग खेल्दैछ । खेल नेपाली समय अनुसार दिउँसो ३ : ४५ मा शारजाह क्रिकेट मैदानमा सुरुहुनेछ ।

न्युजिल्यान्ड नामिबियामाथि विशाल जितको साथ शीर्ष दुईमा रहेर सेमिफाइनल खेल्ने सम्भावना बलियो बनाउन चाहन्छ । न्युजिल्यान्डले अन्तिम खेलमा आइतबार अफगानिस्तानसँग खेल्नेछ । यी दुई खेलमा विजयी भएमा न्युजिल्यान्ड सेमिफाइनल खेल्नेछ । आजको खेलमा नामिबियालाई फराकिलो अन्तरले हराउँदा र अन्तिम खेलमा झिनो अन्तरको हार बेहोर्दा पनि शीर्ष दुईमा रहने सम्भावना बलियो छ ।

त्यसैले न्युजिल्यान्डको सोच आजको खेलमा विशाल जित हुनेछ । नामिबिया खेलमा उच्च प्रतिस्पर्धा गर्न चाहन्छ । न्युजिल्यान्ड पहिलो खेलमा पाकिस्तानसँग ५ विकेटले पराजित भएको थियो । दोस्रो खेलमा भारतलाई ८ विकेट र तेस्रो खेलमा स्कटल्यान्डलाई १६ रनले हराएको थियो । नामिबियाले पहिलो खेलमा स्कटल्यान्डलाई ४ विकेटले हराएको थियो । दोस्रो खेलमा अफगानिस्तानसँग ६२ रन र पाकिस्तानसँग ४५ रनले पराजित भएको थियो ।

न्युजिल्यान्डका ओपनर मार्टिन गुप्टिल राम्रो लयमा छन् । गुप्टिलले स्कटल्यान्डविरुद्ध ९३ रनको उत्कृष्ट इनिङ खेलेका थिए । उनको लयलाई रोक्न नामिबिया ब्याटरलाई रोक्न कठिन पर्नसक्छ । आक्रामक ब्याटर गुप्टिल विष्फोटक इनिङ खेल्नसक्छन् । डर्याल मिचेल, केन विलियम्सन डेवन कन्वे र ग्लेन फिलिप्स प्रमुख ब्याटर हुन् । विलियम्सनको प्रदर्शन निकै महत्वपूर्ण हुनेछ । ट्रेन्ट बोल्ट र तीव्र गतिका बलिङ हतियार हुन् । स्पिनर ईश सोधीले लगातार राम्रो प्रदर्शन गर्दै आएका छन् । उनी नामिबियाका ब्याटरलाई घातक बन्नसक्छन् ।

नामिबिया डेविड विसे प्रमुख खेलाडी हुन् । २०१६ मा दक्षिण अफ्रिकाबाट टि२० विश्वकप खेलेका विसेको उत्कृष्ट प्रदर्शनको सहयोगमा सुपर १२ मा स्थान बनाएको थियो । पहिलो पटक टि२० विश्वकप खेलेको नामिबियाले उत्कृष्ट प्रदर्शन गर्दै आएको छ । विसेले आफ्नो अनुभवको भरपूर्ण फाइदा उठाउन सक्छन् । केग विलियम्स र कप्तान गेरहार्ड इरास्मस प्रमुख ब्याटर हुन् । यी दुई ब्याटरको प्रदर्शन नामिबियालाई निकै महत्वपूर्ण हुनेछ । जेजे स्मित तल्लोक्रमका फिनिसर हुन् । तीव्र गतिका बलर रुबेन ट्रम्पलम्यानले पनि उत्कृष्ट प्रभाव छाड्दै आएका छन् ।