Wed Jan 19 2022
देश

चिसो बढेको भन्दै हेटौँडाका विद्यालय बन्द

काठमाडौं । वर्षाका कारण चिसो बढेको भन्दै मकवानपुरको हेटौँडा उपमहानगरपालिकाले आज एक दिनका लागि विद्यालय बन्द गर्ने भएको छ ।

गए रातिदेखि परेको वर्षाका कारण चिसो बढेपछि विद्यालय बन्द गर्ने निर्णय भएको हेटौँडा उपमहानगरपालिकाका मेयर हरि बहादुर महतले जानकारी दिए ।

चिसो बढ्नुको साथै लगातार वर्षा भइरहेकाले आज एक दिनको लागि उपमहानगर क्षेत्रका सम्पूर्ण विद्यालयको पठनपाठन बन्द हुने भएको हो ।

वर्षा र चिसोको कारण विद्यार्थीको स्वास्थ्यमा पर्न सक्ने प्रतिकुल असरलाई मध्यनजर गर्दै एक दिनको लागि उपमहानगर भित्रको विद्यालयहरू बन्द गर्न लागिएको नगरका शिक्षा विकास महाशाखा प्रमुख गंगाधर रिमालले जानकारी दिए ।