Wed Jan 19 2022
देश

काठमाडौं र ललितपुरका बालबालिकालाई भोलिदेखि कोरोना खोप दिइने

काठमाडौं । काठमाडौं र ललितपुरका १२ देखि १७ वर्ष उमेर समूहका बालबालिकालाई भोलि देखि विद्यालयमै गएर कोभिड–१९ विरुद्धको फाइजर खोप दिइने भएको छ ।

जिल्ला स्वास्थ्य कार्यलय काठमाडौंका प्रमुख शम्भु काफ्लेका अनुसार काठमाडौं जिल्लाका करिब दुई लाख ७० हजार विद्यार्थीलाई खोप लगाउने लक्ष्य छ ।

विद्यालयबाट प्राप्त संख्याभन्दा १० प्रतिशत बालबालिका थप हुने अपेक्षा स्वास्थ्य कार्यालयले गरेको छ ।

तीन लाख बालबालिकालाई पुग्ने खोप लगायतका आवश्यक सामग्री खोप केन्द्रहरुमा पठाउने उनले बताए ।

ललितपुरले पनि मंगलबारदेखि ६ वटै स्थानीय तहका बालबालिकालाई फाइजर खोप दिने भएको छ ।

स्वास्थ्य कार्यालय ललितपुरका प्रमुख सतिस विष्टका अनुसार ७१ हजार ३०१ जना बालबालिकालाई खोप दिने लक्ष्य रहेको छ ।

भक्तपुर जिल्लाका केही स्थानीय तहले भने आइतबारदेखि नै बालबालिकालाई खोप लगाउन शुरु गरिसकेको छ ।