Sat Jul 2 2022
देश

श्रीमतीको हत्यापछि भागेका आरोपित श्रीमान ७ वर्षपछि पक्राउ

कपिलवस्तु । कपिलवस्तुमा श्रीमतीको हत्या गरी फरार रहेका आरोपित श्रीमान ७ वर्षपछि मंगलबार पक्राउ परेका छन् ।

भारत सिद्धार्थनगर तहसिल नौगढ ग्राम धन्सा बस्ने ३० वर्षीय मुलायम भन्ने सिकन्दर चमारलाई जिल्ला प्रहरी कार्यालय कपिलवस्तुले पक्राउ गरेको प्रहरी नायब उपरीक्षक धर्मराज भण्डारीले जानकारी दिएका छन् ।

उनीमाथि कपिलवस्तु कृष्णनगर नगरपालिका–६ श्रीनगरकी २१ वर्षीया किसलावती चमारको हत्या आरोप छ।

किसलावती मुलायमकी श्रीमती थिइन्।
घटना २०७१ फागुन ३० गतेको हो। मुलायम किसलावतीलाई लिएर श्रीनगरस्थित ससुराली आएका थिए ।

त्यो दिन बेलुकी खाना खाएर उनीहरू त्यही सुतेका थिए। मृतक किसलावतीका बुवा ४९ वर्षीय सुखराम भने गोठमा सुत्न गएका थिए।

त्यही मौका छोपी मुलायमले आफ्नी श्रीमती किसलावतीलाई गाउँको दक्षिण(पश्चिममा रहेको खेतमा लगेर हत्या गरेको प्रहरी नायब उपरीक्षक भण्डारीले बताए। हत्यापछि उनले आगो समेत लगाएको आरोप छ। सो घटनापछि उनी फरार भएका थिए।

शव फेला पारेपछि स्थानीयले सुखरामलाई फोन गरी जानकारी दिएका थिए । शवको खुट्टा भने दुई दिनपछिमात्रै कुकुरले लगिरहेको अवस्थामा फेला परेको प्रहरी नायब उपरीक्षक भण्डारीले बताए।

बुवा सुखरामले आफ्नी छोरीको शव घटना भएको भोलिपल्ट घरबाट अन्दाजी ३०० मिटर टाढा रहेको खेतमा काटिएको र जलाइएको अवस्थामा फेला परेको थियो ।

मुलायम चमार घटनापछि भारतमा आफ्नी बहिनीको घरमा लुकेर बसेको खुलेको थियो । तर प्रहरी पुग्दा उनी त्यहाँबाट पनि फरार भइसकेको कार्यालयले जनाएको छ।

मुलायमको परस्त्रीसँग सम्बन्ध भएको र दुई वर्षकी छोरी समेत भइसकेको बुवा सुखरामले प्रहरीलाई बताएका छन्। त्यही कारणले आफ्नी छोरीको हत्या गरेको सुखराम बताउँछन् ।

प्रहरीले गोप्य सूचनाको आधारमा खोज्दा मुलायमलाई मंगलबार राति साढे १० बजे यशोधरा गाउँपालिका(६ रंगपुरस्थित नेपाल भारत दशगजा सिमानामा पक्राउ गरेको हो।

घटनासम्बन्धी थप अनुसन्धान प्रहरीले अघि बढाएको बताएको छ ।