Thu Aug 18 2022
मुख्य खबर

आगामी माघ १२ मा हुने राष्ट्रियसभा निर्वाचनमा झण्डै ६ करोड रुपैयाँ खर्च लाग्ने

काठमाडौंँ । आमागी माघ १२ गते हुने राष्ट्रियसभा सदस्यको निर्वाचनमा झण्डै ६ करोड रुपैयाँ खर्च लाग्ने भएको छ। निर्वाचन आयोगले उक्त निर्वाचनमा पाँच करोड ९० लाख रुपैयाँ खर्च गर्दैछ।

राष्ट्रियसभामा ५९ सदस्य रहने प्रावधान छ। पहिलो कार्यकाल एक तिहाइको २ वर्ष, अर्का एक तिहाइको ४ वर्ष र त्यसपछि निर्वाचन हुने सांसद्को कार्यकाल ६ वर्ष रहने व्यवस्था छ। अहिले निर्वाचन हुने १९ पदको अवधि ६ वर्षसम्म कायम रहनेछ।

आगामी फागुन २० गते रिक्त हुने १९ सदस्य पदका लागि हुने राष्ट्रिय सभाको निर्वाचनमा ४३ जनाको उम्मेदवारी परेको छ। ९ दलका ४३ जना उम्मेदवारबीच प्रतिस्पर्धा हुन लागेको हो।

राष्ट्रियसभाका सदस्यमध्ये फागुन २० गते पदावधि समाप्त हुनेमा नेकपा (एमाले) का आठ, नेकपा (एकीकृत समाजवादी) का चार, नेकपा (माओवादी केन्द्र) का चार र नेपाली कांग्रेसका तीन सदस्य छन्।