Thu Jun 30 2022
मुख्य खबर

त्रिवेणीघाटमा स्नान गर्नेको भीड

काभ्रेको पनौती नगरपालिका–७ स्थित त्रिवेणीघाटमा स्नान गर्नेको भीड लागेको छ ।
१२ वर्षमा लाग्ने बृहत मकर मेला स्थगित भए पनि बिहानैदेखि स्नान गर्नेको भीड लागेको हो ।

त्रिवेणीघाटमा हरेक १२ वर्षमा मकर सक्रान्तिका दिन मेला लाग्छ । त्रिवेणीघाटमा पुण्यमाता, रोशी खोला र पद्मावती तीन नदी छन् ।

त्रिवेणीघाटमा स्नान गर्दा पुण्य हुने विश्वासका साथ भक्तजनले माघ १ गते बिहानै घाटमा पुगेर नुहाउने गर्छन् । त्रिवेणीघाटमा यस वर्ष मेला लाग्ने भएकोले भौतिक संरचनासमेत निर्माण गरिएको थियो । तर, मेला लाग्ने समयमा कोरोना भाइरसको तेस्रो लहर तीव्र रुपमा बढेपछि जिल्ला कोभिड व्यवस्थापन समिति (डीसीएमसी) काभ्रेको बैठकले मेला स्थगित गर्न आयोजकलाई निर्देशन दिएको थियो ।

डीसीएमसीले मेला स्थगित भएको जानकारी दिएर अनावश्यक भीडभाड नगर्न भने पनि त्रिवेणीघाटमा स्नान गर्नेको घुइँचो लागेको हो ।