Wed May 18 2022
अन्तर्राष्ट्रिय

अफगानिस्तानमा सहायता सामग्री हस्तान्तरण

एजेन्सी । मानवीय सङ्कटमा फसेको अफगानिस्तानलाई नेपाल सरकारले सहयोग सामग्री हस्तान्तरण गरेको छ ।

आइतबार बिहान विमानमा सहायता सामग्री लिएर अफगानिस्तान पुगेको नेपाली टोलीले काबुल अन्तर्राष्ट्रिय विमानस्थलमा रहेको संयुक्त राष्ट्रसङ्घका महासचिवका उपविशेष प्रतिनिधि तथा अफगानिस्तानका लागि मानवीय तथा विकास संयोजक रामिज अलकबरोबलाई सहयोग हस्तान्तरण गरेको हो ।

सहायता हस्तान्तरण गरेर टोली स्वदेश फर्किएको छ ।

आइतबार परराष्ट्र मन्त्रालयकी सहसचिव सेवा लम्सालको नेतृत्वमा अफगानिस्तानी जनतालाई आवश्यक औषधि, घरायसी सामग्रीहरु र लत्ता कपडा बोकेर नेपाली टोली अफगानिस्तान प्रस्थान गरेको थियो ।

अफगानिस्तानका जनताका लागि सहायता सामग्री हस्तान्तरण गर्न पाउनु नेपालको लागि गौरवको विषय भएको परराष्ट्र मन्त्रालयकी प्रवक्ता सेवा लम्सालले बताए ।

उनले मानवीय सहायता उपलब्ध गराउने काम परराष्ट्रमन्त्री डा। नारायण खड्काको पहलबाट मात्रै सम्भव भएको बताए ।

अफगानिस्तानमा गएको अगष्टमा तालिबानले आफ्नो हातमा सत्ता लिएपछि त्यहाँ आर्थिक तथा मानवीय सङ्कट उत्पन्न भएको छ ।

अफगानिस्तानमा अहिले खाद्यान्नको अभाव हुनुका साथै लाखौँ बालबालिकालाई कुषोषण हुन थालेको छ ।