Tue May 17 2022
देश

कोरोनाका कारण मनकामना मन्दिर प्रवेशमा रोक

गोरखा । गोरखाको मनकामना मन्दिरमा नित्य पूजा बाहेक सबै धार्मिक गतिविधिमा रोक लगाइने भएको छ ।

भोलिदेखि माघ मसान्तसम्म भक्तजनको प्रवेशमा रोक लगाइने भएको हो । कोरोना संक्रमण बढ्दै गएकाले भक्तजनहरुको प्रवेशमा रोक लगाउने निर्णय भएको बताइएको छ ।

मनकामना क्षेत्र विकास समितिको बैठकले आउँदो बिहीवारदेखि आन्तरिक रुपमा नित्य पूजा मात्रै गर्ने निर्णय गरेको हो ।

कोरोना संक्रमण रोकथामका लागि नेपाल सरकारले जारी गरेको आदेश पालना गर्दै मन्दिरमा भक्तजनको प्रवेशमा रोक लगाउने निर्णय भएको बताइएको छ ।

बलीपूजा, लाखबत्ती बाल्ने जस्ता धार्मिक कार्यक्रम गर्नका लागि मन्दिरमा नआउन पनि क्षेत्र विकास समितिले भक्तजनलाई आग्रह गरेको छ ।

मनकामना केबलकार बन्द गर्नेबारे स्थानीय प्रशासन वा केबलकार व्यवस्थापनले भने कुनै निर्णय गरेको छैन ।