Wed May 18 2022
कर्णाली प्रदेश

जब दुई प्रहरीले आलोपालो बोकेर बाटोमा भेटिएका १०२ बर्षीय बृद्धलाई अस्पताल पुर्‍याए

काठमाडौं – रूकुम पश्चिमको सर्केना प्रहरी चौकी खोलागाउँका प्रहरी जवान स्वयमं प्रकाश हमाल र दलबहादुर बुढा मंगलबार बिहान १०  बजेतिर पैदल गस्तिमा थिए । उनीहरूले बाटोमा एक जना जेष्ठ नागरिक हिँड्न नसकेर भुँइमै बसेको भेटे। चौरजहारी नगरपालिका वडा नं. ११ का १०२ वर्षीय जसबीर वली हिड्न नसकेर बाटोमा बसेका थिए।

हमालले वलीलाई सोधे, ‘कहाँ जान लाग्नु भएको हो, किन यहाँ बस्नु भएको हो ?’ भनेर सोधे । वलीले आफू अस्पताल जान हिडेँको तर हिड्न नसकेर बाँटोमा बसेको बताए। वली केही बेर खोच्याउँदै हिँड्थे र फेरि गलेर सुस्ताउँथे। उनी आँखा पनि कम देख्थे तै पनि एक्लै हिँडिरहेका थिए।

यसरी एकान्त बाटोमा असाहाय बनेका वलीलाई देखेपछि प्रहरी जवानद्धय हमाल र बुढाले सल्लाह गरे । उनीहरुले वलीलाई आलोपालो पिँठ्यूमा बोकेर अस्पताल पुर्‍याउन हिँडे । बिहान १०ः४५ बजेतिर प्रहरी जवान हमाल र बुढाले वलीलाई भेटेका थिए। उनीहरुले आलोपालो पिठ्युमा बोकेरै वलीलाई चौरजहारी १० स्थित सहिद स्मृति अस्पताल पुर्‍याए।

‘बुवालाई त्यसरी बाटोमै बेसाहारा भइ ढेलेको देखेर छाडेर जान मनले मानेन र त्यसैले उहाँकै चाहाना अनुसार अस्पताल पुर्‍याएका हौँ’ हमालले भने । यसरी प्रहरीले पिठ्युमा वृद्ध बोकेर हिडेको तस्बिर अहिले सामाजिक सञ्जालमा भाइरल बनेको छ ।

चौरजहारी ११ का वडाध्यक्ष मनमोहन शाहले दुई प्रहरी जवान हमाल र बुढाले पिठ्यूमा बोकेर जेष्ठ नागरिक वलीलाई अस्पताल पुर्‍याउँदै गरेको तस्बिर आफ्नो फेसबुक वालमा राखेका छन्। शाहले तस्बिर राखेपछि प्रहरी जवान हमाल र बुढाको धेरैले तारिफ गरेका छन्।