Wed Dec 7 2022
मुख्य खबर

एकतर्फी यातायात सञ्चालनमा बिवाद

 सजिना खड्का- म्याग्दी सदरमुकाम बेनीमा लागु गरिएको एकतर्फी यातायात सञ्चालनमा बिवाद भएको छ । सवारी सञ्चालनलाई ब्यवस्थित र सुरक्षित बनाउन गरिएको नयाँ व्यवस्था विवादित बनेसँगै बेनीको सडक अस्तव्यस्त हुन थालेको छ ।

म्याग्दीको सदरमुकाम बेनी सडकमा लागु गरिएको एकतर्फी यातायात सञ्चालन गर्ने नियम हटाउन स्थानीय व्यवसायीहरुले दवाव दिएका छन ।

म्याग्दी उद्योग बाणिज्य संघका पदाधिकारी, बेनीस्थित न्युरोड टोल सुधार समिति र स्थानीय ब्यवसायीहरुले दवाव दिन थालेपछि बिवाद बढेको छ । तर स्थानीय प्रशासन, प्रहरी र ट्राफिक प्रहरी कार्यालयले भने दुर्घटना न्युनीकरण र यातायात ब्यवस्थापनमा प्रभावकारी बनेको एकतर्फी यातायात सञ्चालनलाई निरन्तरता दिनुपर्ने अडानमा छन् ।

गत मंसिर १४ गते बेनी नगरपालिका, जिल्ला प्रशासन कार्यालय, प्रहरी र उद्योग वाणिज्य संघको प्रतिनिधि सम्मिलित बैठकले एकतर्फि यातायात सञ्चालन गर्ने निर्णय गरेका थिए ।

यस्तै फागुन २ गते नगरपालिकामा बसेको टोल सुधार समिति र उद्योग बाणिज्य संघ सहितको बैठकले एकतर्फी यातायातका कारण ब्यवसायमा गम्भिर असर परेको र असुबिधा भएको भन्दै एकतर्फी यातायात सञ्चालनको व्यवस्था हटाउनु पर्ने निर्णय गरेका छन् । तर दुर्घटना न्युनिकरण हुनुका साथै सवारी आवतजावत, पैदलयात्रुलाई सहज भएको र जामको समस्या हटेकाले एकतर्फी यातायात सञ्चालनलाई निरन्तरता दिनुपर्ने स्थानीयले बताएका छन् ।

बेनी बजारलाई सुरक्षित र ब्यवस्थित बनाउन लागू गरिएको एकतर्फि यातायात सञ्चालनका क्रममा देखिएका कमी कमजोरीको सुधार गर्दै जान जरुरी छ ।