Wed Aug 17 2022
देश

महिला हिंसाको विरोधमा पुरुषहरुको र्‍याली

काठमाडौं । अन्तर्राष्ट्रिय श्रमिक महिला दिवसको अवसरमा मङ्गलबार ललितपुरमा युवाहरुले महिला तथा बालिकामाथि हुने हिंसाका विरुद्ध आवाज उठाउने प्रतिबद्धता जनाउदै सचेतनामूलक र्‍याली निकालिएको छ ।

एक दर्जनभन्दा बढी संस्थाहरूको आयोजनामा भएको र्‍याली ललितपुरको मङ्गलबजारबाट सुरु भई गाबहाल, पुल्चोक हुँदै जावलाखेलमा आई कोणसभामा परिणत भएको थियो ।

उनीहरुले पुरुषहरूका अतिरिक्त करिब सय महिलाहरूले समापन भेलामा ऐक्यबद्धता जनाएका थिए । कार्यक्रममा महिला तथा बालिका विरुद्धको हिंसा कम गर्नमा पुरुषको भूमिका विषयमा कविता वाचन पनि गरिएको थियो ।

यो कार्यक्रमलाई आगामी वर्षमा पनि निरन्तरता दिइने कार्यक्रमको समन्वय गरेको संस्था युवालयका अध्यक्ष सन्तोष महर्जनले बताए । युवालयले २०७० सालदेखि हरेक वर्ष महिला दिवसका दिन कार्यक्रम गर्दै आएको छ ।