Mon Jul 4 2022
अन्तर्राष्ट्रिय

दक्षिण कोरियामा राष्ट्रपतीय निर्वाचन शुरु

दक्षिण कोरियामा राष्ट्रपति चयनका लागि मतदान शुरु भएको छ । चर्को राजनीतिक ध्रुवीकरणबीच नयाँ राष्ट्रपति चयनका लागि मतदान भएको अन्तर्राष्ट्रिय सञ्चारमाध्यमले जनाएका छन् ।

५ करोड २० लाख जनसंख्या रहेको दक्षिण कोरियामा १८ वर्षभन्दा माथिका ४ करोड ४० लाख जनता चुनावमा मतदान गर्न योग्य छन् । यसबाहेक १ करोड ६० लाखले मतदानको दिन अगावै मत दिइसकेको जनाइएको छ ।

चुनावी प्रतिस्पर्धामा सत्तारुढ लिवरल पार्टीका उम्मेद्वार ली जे म्युङ तथा उनका कन्जरभेटिभ प्रतिद्वन्द्वी युन सुक योल अघि रहेको जनाइएको छ । अरु १० जना पनि चुनावी मैदानमा रहेपनि मुख्य प्रतिस्पर्धा यिनै दुई उम्मेदवारबीच हुने जनाइएको छ ।

यद्यपि उत्तर कोरियाली खतरालाई सम्बोधन गर्ने विषयमा दुबै उम्मेदवारसँग स्पष्ट रणनीति नभएको आलोचकहरूको भनाइ छ । निर्वाचित हुने उम्मेदवारले आगामी मे महिनामा ५ वर्षको एकल राष्ट्रपतीय कार्यकाल सम्हाल्नेछन् ।

कोरोना भाइरसको महामारी र राजनीतिक ध्रुवीकरण उत्कर्षमा रहेका बेला चुनाव हुन लागेको हो । बुधबारमात्रै दक्षिण कोरियाली स्वास्थ्य अधिकारीहरूले मुलुकमा ३ लाख ४२ हजार जनामा कोरोना भाइरसको संक्रमण देखिएको जनाएका थिए । कोरोना भाइरसको महामारी शुरु भएयता दक्षिण कोरियामा देखिएको सबैभन्दा ठूलो संख्या हो ।

चुनावको नतिजा बिहीबारसम्म आइसक्ने अन्तर्राष्ट्रिय सञ्चारमाध्यमले जनाएका छन् ।