Wed Jun 29 2022
समाचार

सार्वजनिक यातायातको भाडा समायोजन गर्नुपर्ने माग

ललितपुर। नेपाल यातायात व्यवसायी राष्ट्रिय महासङ्घले सार्वजनिक यातायातको भाडा समायोजन गर्नुपर्ने माग गरेको छ । महासङ्घले यहाँ आज पत्रकार सम्मेलन गरी इन्धनमा भएको अत्यधिक मूल्य वृद्धिका बाबजुद सरकारले भाडा समायोजनमा बेवास्ता गरेको भन्दै जतिसक्दो चाँडो भाडा समायोजन गर्नुपर्ने माग गरेको हो ।

सरकारले पेट्रोलियम पदार्थको मूल्य अत्यधिक बढाएपछि यातायात व्यवसायीले भाडा वृद्धि गर्नुपर्ने माग गर्न बाध्यता भएको महासङ्घको भनाइ छ ।

महासङ्घका अध्यक्ष योगेन्द्रनाथ कर्माचार्यले पछिल्लो समय इन्धनमा भएको मूल्य वृद्धिको विरोध गर्दै आगामी चैत ७ गतेसम्म भाडा समायोजन नभएमा बाध्य भई वैज्ञानिक भाडा कार्यविधिलाई आधार मानी महासङ्घले नै भाडा समायोजन गर्ने बताउनुभयो ।

उहाँले भन्नुभयो, “विसं २०७८ असारमा भाडा बढाए लगत्तै तीन दिनपछि फेरि पट्रोलियम पदार्थको मूल्य बढ्यो, त्यसयता सात पटक बढ्यो तर भाडा समायोजन भएको छैन । सरकारलाई सवारी साधनको भाडा नबढाऔँ तर मूल्य वृद्धि फिता गराँै भनेर हामीले पटकपटक आग्रह गर्दै आएका छौँ, सुनुवाइ भएको छैन ।”