Thu May 19 2022
Breaking News

घट्यो कोरिया मोह

नरेन्द्र महतारा- सन् २०२२ मा हुने कोरियन भाषा परीक्षाका लागि खुलाइएको आवेदनमा परीक्षार्थीहरुको सहभागितामा कमी आएको छ ।

विगतका वर्षहरुमा भाषा परीक्षाका लागि परीक्षार्थीहरुको उल्लेख्य सहभागिता रहने भएपनि यो वर्ष परीक्षार्थीहरुको सहभागितामा कमी आएको हो ।
यस अघि ९० हजारभन्दा माथि आवेदन परेको भएपनि यो वर्ष भने ४० देखि ५० हजारको हाराहारीमात्रै आवेदन पर्ने देखिएको छ ।

सन् २०२२ मा हुने कोरियन भाषा परीक्षाको आवेदनका लागि ललितपुरको ग्वार्कोमा रहेको ईपीएस शाखा कार्यालयमा सीमित मात्रामा आवेदकहरु फाराम भरिरहेका छन् ।
भाषा परीक्षाको आवेदनका लागि विगतमा उल्लेख्य सहभागिता भएपनि अहिले भने त्यो संख्यामा कमी आएको छ । अघिका वर्षहरुमा सरदर ९० हजारदेखि १ लाखसम्म आवेदन पर्ने गरेको थियो । तर यो वर्ष भने यो संख्या ४० देखि ५० हजार मात्र पुग्ने ईपीएस शाखा कार्यालयले जनाएको छ ।

सोमबारसम्म आवेदन दिने म्याद सकिँदै छ । कार्यालयका अनुसार आइतबार मध्यान्ह साढे १२ बजेसम्म जम्मा २८ हजार ५ सय ४१ जनाले आवेदन दिएका छन् । जसमा कृषितर्फ ६ हजार ४ सय ४९ जना, उत्पादनतर्फ २२ हजार १ सय ११ आवेदन परेको छ ।
जम्मा आवेदकबाट ९ हजार ६ सय आवेदक मात्र उतिर्ण हुनेछन् ।

उतिर्णहरु मध्येबाट रोजगारदाताले उपयुक्त कामदार छनोट गर्नेछन् । समग्रमा भने आवेदकको संख्यामा कमी आएको देखिन्छ । आवेदकको संख्यामा कमी आउनुको मुख्य कारण कोभिड महामारी र दक्षिण कोरिया लाने प्रक्रिया लामो र झण्झटिलो भएकाले यो समस्या आएको आवेदकहरुको बुझाइ छ ।

कार्यालयका अनुसार कोरोना महामारीपछि १ हजार ६ सय ७२ कामदार दक्षिण कोरिया उडिसकेका छन् । जसमा प्रतिवद्ध कामदार ७ सय ५७ छन् भने नियमित कामदार ९ सय १५ जना छन् ।
आउँदो ६ तारिखमा २ सय १९ जनालाई कोरिया उडाउने तयारी छ । कोरियाका लागि प्रत्येक हप्ताको एक दिनमात्र उडान हुने गरेको छ ।
हप्तामा दुई दिन उडान हुने भनिएपनि अहिलेसम्म त्यसो हुन सकेको छैन । दक्षिण कोरिया उडानका लागि साढे ६ हजारजना नेपाली कामदार लाइनमा छन् । यिनीहरुलाई आगामी ६ महिनाभित्रमा कोरिया पठाइसक्ने सरकारको तयारी छ । विगतका वर्षहरुमा आवेदनमा उल्लेख्य सहभागिता भएपनि विविध कारणवश यो वर्ष आवेदनमा कमी आएको कार्यालयले जनाएको छ ।

कोरियन भाषा परीक्षा बैशाखमा हुने भनिएपनि बैशाखमा स्थानीय तहको निर्वाचनका कारण परीक्षाको मिति जेठसम्म सारिएको छ । परीक्षा जेठमा गर्ने तयारी गरेको कार्यालयले जनाएको छ ।