Mon May 16 2022
Breaking News

काठमाडौंमा राहुल गान्धीले रमाइलो गर्दा भारतमा हंगामा

काठमाडौं – नेपाल भ्रमणमा रहेका भारतीय काँग्रेस पार्टीका नेता राहुल गान्धीले नाइटक्लबमा रमाइलो गरेको भिडियो हाल भारतमा भाइरल भइरहेको छ । भारतीय सामाजिक सञ्जालमा गान्धीले लर्ड अफ द ड्रिङ्क्समा रमाइलो गरेको भिडियो भाइरल भएको हो । यसबाहेक भारतीय सञ्चारमाध्यमहरुले पनि राहुलको नाइटक्लब भ्रमणलाई निकै प्राथमिकताका साथ ठाउँ दिएका छन् ।

यता सत्तारुढ भारतीय जनता पार्टी भाजपाका नेताहरुले भने भिडियो शेयर गर्दै गन्धीमाथि निशाना साँधेका छन् । भाजपाका प्रवक्ता शाहजाद पुनावालाले गान्धीले जे गरेपनि उनको निजी मामिला रहेको टिप्पणी गरेका छन् ।

यद्यपि जब काँग्रेसको नेतृत्वमा रहेको राजस्थान राज्यको ‘जोधपुरमा हिंसा मच्चिरहेको छ, राजस्थान जलिरहेको छ, त्यसको चिन्ता गर्नुको साटो गान्धी नेपालमा पार्टी गरेर बसेको देखिन्छन । जबकी उनले भारतीय जनताका साथ उनीहरुको समस्याबारे जान्नका लागि हुनुपर्ने हो ।’ पुनावालालाई उद्धृत गर्दै भारतीय टेलिभिजन च्यानल आजतकको अनलाइन संस्करणले जनाएको छ ।

त्यस्तै, भारतका केन्द्रीय मन्त्री किरण रिजिजुले पनि भिडियो शेयर गर्दै गान्धीको आलोचना गरेका छन् । उनका अनुसार छुट्टी मनाउनु, पार्टी गर्नु, प्लेजर ट्रिपमा जानु निजीस्तरमा विदेश घुम्न जानु अब देशका लागि नयाँ कुरा नभएको टिप्पणी गरेका छन् ।

त्यसैगरी भाजपाका सामाजिक सञ्जाल इन्चार्ज अमित मालवीयले पनि गान्धीको आलोचना गरेका छन् । उनले ट्विटरमा गान्धीको भिडियो शेयर गर्दै लेखेका छन्, ‘मुम्बईमा आक्रमण हुने बेला पनि राहुल गान्धी नाइटक्लब मै थिए । पार्टी विष्फोट भइरहेका बेला पनि उनी नाइटक्लब मै छन् । उनमा निरन्तरता छ ।’

यता भारतीय काँग्रेस पार्टीले भने गान्धीको बचाउ गरेको छ । आजतकका अनुसार काँग्रेस पार्टीका प्रवक्ता रणदीप सुरजेवालाले गान्धीले केही गलत काम नगरेको टिप्पणी गरेका छन् । गान्धी आफ्नी साथीको बिहेमा सहभागी हुन काठमाडौं आएको भन्दै यो उनको निजी भ्रमण भएको बताएका छन् । कसैको बिहेमा सहभागी हुनु अपराध नभएको सुरजेवालाको टिप्पणी छ ।

गान्धी मंगलबार एकजना साथीको बिहेमा सहभागी हुन नेपाल आएका हुन् । उनी शुक्रबारसम्म नेपालमै रहने बताइएको छ ।