Mon May 16 2022
मुख्य खबर

अन्धकारमय काठमाडौँलाई उज्यालो बनाएर सबैका लागि सुरक्षित बनाउछु: सृजना सिंह

काठमाडौँ महानगरपालिकामा नेपाली कांग्रेससहितको गठबन्धनबाट मेयर पदमा उम्मेदवारी दिएकी सिर्जना सिंहले काठमाडौँलाई सफा, स्वस्थ, हराभरा बनाउने प्रतिबद्धता व्यक्त गरेकी छन् ।

शान्ति, न्याय र लोकतन्त्रका लागि समावेशी महिला सञ्जाल संकल्प र महिला गैरसरकारी संस्था महासंघको संयुक्त आयोजनामा सोमबार काठमाडौँमा भएको कार्यक्रममा कांग्रेस नेतृ सिंहले आफूले अन्धकारमय काठमाडौँलाई उज्यालो बनाएर सबैका लागि सुरक्षित काठमाडौँ बनाउने बताइन् ।

वर्षौंसम्म सक्रिय राजनीति गरे पनि कहिल्यै पदको अपेक्षा नगरेको उनको भनाइ छ । महानगरको हकमा युवाहरूलाई खेलकुदमा प्रोत्साहन गर्ने, पर्यटकीय,व्यापारिक केन्द्र बनाउने,स्वदेशमै रोजगारको सिर्जना गरेर वैदेशिक रोजगारमा जाने क्रमलाई न्यूनीकरण गर्नेलगायतका काम प्राथमिकतामा राखेर गर्ने कांग्रेस नेतृ सिंहले बताइन् ।

त्यसैगरी, विवेकशील साझा पार्टी काठमाडौँबाट मेयरकी उम्मेदवार समीक्षा बाँस्कोटाले २५ वर्षमा महानगरले ठूला पार्टीका नेताबाट कुनै परिवर्तन नपाएकोले गुनासो पोखिन् ।

बाँस्कोटाले सार्वजनिक यातायातमा हुने हिंसाको न्यूनीकरण, ढलको समस्या समाधान, सार्वजनिक शौचालय, ढुङ्गेधारा र सम्पदाको संरक्षण गर्नु आफ्नो पार्टीको उद्देश्य रहेको बताइन् ।

काठमाडौँ महानगरकी एमाले उपमेयर उम्मेदवार सुनिता डंगोलले अग्रजहरूको आशिर्वाद लिएर नयाँ पुस्ताले नेतृत्व लिनुपर्ने बताइन् ।