Wed May 18 2022
समाचार

आज मध्यरातिदेखि मौन अवधि लागू हुने

स्थानीय तह निर्वाचनका लागि आज राति १२ बजेदेखि मौन अवधि लागू हुँदैछ ।निर्वाचन आचारसंहिताअनुसार मतदान सुरु हुनुभन्दा ४८ घण्टा अगाडिदेखि मौन अवधि लागू हुने निर्वाचन आयोगले जनाएको छ । मतदान सम्पन्न नभएसम्म मौन अवधि कायम रहनेछ ।

आयोगका  अनुसार मौन अवधिमा प्रचार प्रसारलगायतका गतिविधिमा निर्वाचन आचारसंहिता लागू हुनेछ। आयोगका अनुसार यस अवधिमा निर्वाचन प्रचारप्रसार गर्न र मत माग्न पाइने छैन।

निर्वाचन धाँधलीरहित, स्वच्छ, निष्पक्ष, भयमुक्त वातावरणमा सम्पन्न गर्न मौन अवधि तोकिएको हो । मौन अवधिभर दल, तिनका भ्रातृ संगठन, उम्मेदवार, संघ संगठनलगायतले राजनीतिक प्रचार, भेला, गोष्ठी आयोजना गर्न नपाउने आयोगको आचारण निर्देशिकामा उल्लेख छ । निर्देशिकाविपरीत मौन अवधिमा मतदाता प्रभावित पार्ने गतिविधि गरे उम्मेदवारी रद्ददेखि १ लाख रुपैयाँ जरिवानासम्मको कारबाही हुन सक्ने निर्वाचनसम्बन्धी कानुनमा उल्लेख छ ।