Wed Aug 17 2022
अन्तर्वार्ता

निजी क्षेत्रलाई विश्वासमा नलिइ औद्योगिक विकास सम्भव छैनः मन्त्री बडू

उद्योग, वाणिज्य तथा आपूर्ति मन्त्री दिलेन्द्रप्रसाद बडूले निजी क्षेत्रलाई विश्वासमा लिएर औद्योगिक उत्पादन बढाउने बताएका छन् । नेपाल उद्योग परिसंघ (सीएनआई)ले आयोजना गरेको कार्यक्रममा सम्बोधन गर्दै उनले निजी क्षेत्रलाई विश्वासमा नलिइ औद्योगिक विकास र उत्पादन वृद्धि सम्भवन नरहेको बताएका हुन् ।

‘निजी क्षेत्र सक्रिय नभइ उत्पादन वृद्धि हुँदैन,’ उनले भने, ‘निजी क्षेत्रलाई विश्वासमा नलिइ मुलुकको आर्थिक विकास सम्भव छैन ।’ त्यसैले आन्तरिक उत्पादन बढाउने र खपत (उपभोग) बढाउने गरी वृहत अभियान सञ्चालन गर्ने मन्त्री बडूले बताए । उनले त्यसका लागि २०७९–८९ सम्मको एक दशक लामो अभियान सुरू गर्ने बताए ।

उत्पादन र उपभोगको दशक अभियान सञ्चालन गर्न उद्योगलाई प्रतिस्पर्धी बनाउने र उत्पादन लागत घटाउने योजना उद्योग मन्त्रालयले बनाइरहेको उनको भनाइ छ । यसका लागि कच्चा पदार्थमा अनुदान दिने योजना समेत मन्त्रालयको छ । उनले हाल मुलुकको अर्थतन्त्र सकरात्मक स्थितीमा नरहेकाले यसबाट पार पाउँन उद्योगमन्त्री नीति ल्याउँदै उत्पादन बढाउनुपर्ने बताए ।

‘स्वदेशमा रोजगारीको अवसर सृजना गर्नका लागि पनि स्वदेशी उत्पादन बढाउनै पर्छ,’ मन्त्री बडूले भने, ‘अर्थतन्त्र उकास्न निर्यातलाई सक्दो बढाउनुपर्छ ।’ यसका लागि सात वटै प्रदेशमा औद्योगिक क्षेत्र र ७५३ वटै पालिकामा औद्योगिक ग्रामको कल्पना गरिएको र त्यसलाई गति दिन नसकिएको उनले स्वीकारे । यद्यपी, अब अघि बढाउनतर्फ मन्त्रालय अग्रसर रहेको उनको भनाइ छ ।