Wed Jun 29 2022
देश

मण्डला थिएटरमा आजदेखि ‘चोरको स्वर’

नाटक ‘चोरको स्वर’ को मञ्चन आजबाट हुने भएको छ । मण्डला थिएटरमा सोमबार बाहेक हरेक दिन साँझ ५ बजे नाटक मञ्चन हुने मण्डला थियटरले जनाएको छ । नाटकको शनिबार भने दिउँसो १ बजे अतिरिक्त शो समेत हुनेछ ।

आर्टमाण्डु नेपाल प्रालिको प्रस्तुति रहेको नाटक लिम्बू समुदायमा हुने भागी विवाहको बिषयमा आधारित छ । जवान लिम्बू केटाले केटी भगाएपछि केटा पक्षबाट तपाइँको छोरी चेली हाम्रो साथमा छ, हाम्रो छोरा–भतिजले माया गरेर, खुसीसाथ राखेको छ भनेर जानकारी दिने परम्परालाई ‘चोरको स्वर’ भनिन्छ । नाटकले लिम्बू संस्कार, रीतिरिवाज अनुसार विवाहको प्रसंग अघि बढ्छ । नाटकले यी विषयमाथि गहिरिएर देखाउने छ ।

नवीन चौहानको कथा, अनिल सुब्बा र अन्वेश राई थुलुङको परिकल्पना तथा निर्देशन रहेको नाटक असार १५ गतेसम्म साेमबार बाहेक नियमित मञ्चन हुनेछ । नाटकमा अनिल सुब्बा, रुपेश लामा, कवि राई, लक्ष्मी योङ्हाङ, इँगिहोपो कोइँच सुनुवार, संगीता थापामगर, वेदना राईलगायतको अभिनय छ ।