Sun Jun 26 2022
Breaking News

प्रेमीको घरमै छिरेर आतंक मच्चाएको आरोपमा लुम्बिनीकी राज्यमन्त्री प्रहरी नियन्त्रणमा

दाङ– लुम्बिनी प्रदेशकी स्वास्थ्य राज्यमन्त्री विमलाकुमारी वलीले आफ्नो प्रेमी एकराज बस्नेतकी श्रीमती र छोरीमाथि कुटपिट गरेकी छन् ।

प्रेमीको घरमै छिरेर आतंक मच्चाएपछि प्रहरी उनलाई नियन्त्रणमा लिएको छ । प्रहरीले उनलाई नियन्त्रणमा लिएर जिप्रका तुलसीपुरमा पुर्‍याएको छ ।

मन्त्री वली आफ्ना एक पीएसओसहित आज बिहान प्रेमी एकराज बस्नेको तुलसीपुर–५ बसपार्क आलुमण्डीस्थित घरमा पुगेकी स्थानीयले बताएका छन् ।

प्रत्यक्षदर्शीका अनुसार उनले घरभित्र छिरेर ‘मेरो एकराज खोइ रु ‘ भन्दै आतंक मच्चाएकी थिइन् । त्यसक्रममा उनले एकराजकी श्रीमती र छोरीमाथि कुटपिट गर्नुका साथै कोठाभित्रको दराजसमेत तोडफोड गरेको बताइएको छ ।

घटना हुँदा एकराज घरमा थिएनन् । उनका आफन्तहरुले प्रहरीलाई खबर गरेका थिए । इप्रका तुलसीपुरबाट प्रहरी टोली आएर विमलालाई नियन्त्रणमा लिएको हो ।

गत वर्षको भदौमा विमला वलीले आफ्नो फेसबुक स्टोरीमा एकराजलाई चुम्बन गरिरहेको फोटो पोष्ट गरेकी थिइन् । उक्त तस्वीरसहितको समाचार सञ्चारमाध्यममा प्रकाशित भएपछि विमला र एकराजले फोटोसप गरिएको दावी गरेका थिए । वलीले एकराज आफ्नो भाइ पर्ने बताउँदै आएकी थिइन् ।

विमलाका श्रीमानको केही समयअघि दुर्घटनामा मृत्यु भएको थियो ।