Sun Jun 26 2022
मुख्य खबर

नेता कार्यकर्तालाई माधव नेपालको निर्देशन : गठबन्धनको गीत गाउन छाड्नुस

नेकपा (एकीकृत समाजवादी) का अध्यक्ष माधवकुमार नेपालले पार्टीका नेता कार्यकर्तालाई गठबन्धनको गीत गाउन बन्द गर्नुपर्ने बताएका छन् । आइतबार सम्पादकहरूसँगको अन्तरक्रिया कार्यक्रममा बोल्दै अध्यक्ष नेपालले गठबन्धनबाटै सबै थोक हुन्छ भनेर गठबन्धनको मात्र गीत गाएर नहुने बताएका हुन्।

अध्यक्ष नेपालले आगामी मंसिरमा हुने प्रादेशिक तथा संघीय चुनावमा पार्टीले आफ्नो शक्ति वृद्धि गर्ने कुरामा जोड दिनुपर्ने उल्लेख गरे। गठबन्धनले सब थोक गरिदिन्छ भनेर नबसौँ, अध्यक्ष नेपालले भने, ‘ ७५३ वटै स्थानीय तहमा संगठन निर्माण गरी पार्टीलाई बलियो बनाउन लाग्नुपर्छ, गठबन्धनको गीत गाउन बन्द गर्नुस्।’

अध्यक्ष नेपालले स्थानीय निर्वाचनमा पनि पार्टीले सम्मानजनक मत पाएको बताए । महानगरपालिका र उपमहानगरपालिकामा प्रमुख पद जितेको र विभिन्न गाउँपालिकाहरूमा अध्यक्ष पद जितेको बताउँदै उनले अझै सक्रिय भएर जनताको घरघरमा जान सके आगामी निर्वाचनमा महत्त्वपूर्ण मत पाउन सकिने बताए।

उनले मतदाताहरूलाई मतपत्र बारे राम्ररी बताउन नसक्दा पनि मत बदर भएको र पार्टीका उम्मेदवारले हार बेहोर्नुपरेको बताए।

अध्यक्ष नेपालले निर्वाचन आयोगका कारण पनि एकीकृत समाजवादीले पराजय भोग्नुपरेको बताए। मेयर, उपमेयर र अन्य पदका लागि छुट्टाछुट्टै मतपत्र छाप्ने प्रतिबद्धता व्यक्त गरेको आयोगले अन्तिममा गएर धोका दिएको समेत उनले बताए।