Wed Jun 29 2022
मुख्य खबर

विवाहको प्रलोभन देखाएर बलात्कार, बेहोस बनाएर पैसा र गहना लुटेर फरार

महिलालाई बलात्कार गरी नगद र गहना लुटपाट गर्ने एक जना पक्राउ परेका छन् ।

गत जेठ २९ गते बेलुकी २४ वर्षीय महिलालाई काठमाडौं महानगरपालिका–११ भोटेबहालको एक गेष्ट हाउसमा लगेर बलात्कार गरेको आरोपमा उनी पक्राउ परेका हुन्।

काभ्रेपलाञ्‍चोक तेमाल गाउँपालिका–९, घर भइ हाल बनेपा डेरा गरी बस्ने ३० वर्षीय विश्व तामाङले पेयपदार्थमा लठ्ठिने पदार्थ मिसाएर खुवाई बलात्कार गरेको प्रहरीले जनाएको छ।

विवाहको प्रलोभनमा पारी गेष्ट हाउसमा लगेका उनले बलात्कारपछि महिलाको साथमा रहेको नगद एक लाख, दुई तोला सुन र एउटा मोबाइल समेत लुटी फरार भएका थिए।

पीडितले जेठ ३१ गते प्रहरी वृत्त कालीमाटीमा उजुरी दिएपछि यही असार ५ गते राति ११ बजे तामाङलाई कालिमाटीबाट पक्राउ गरेको हो।

प्रहरीले घटनाको अनुसन्धान गर्ने क्रममा उनलाई अदालतबाट सात दिनको म्याद थप गरी अनुसन्धान थालिएको काठमाडौं प्रहरीले जनाएको छ।