Sat Oct 1 2022
अन्तर्राष्ट्रिय

भ्रष्ट नेताहरुको अपराधिक गठबन्धनलाई जनताले पराजित गर्नेछन् : केपी ओली

झापा । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले सबैखाले गठबन्धनविरुद्ध एक्लै लड्न एमाले तयार रहेको भन्दै चुनावमा जनताले नेताको गठबन्धनलाई ठेगान लगाउने दाबी गरेका छन् ।

गृहनगर दमकमा स्वतन्त्र मजदूर संगठनको सम्मेलनलाई सम्बोधन गर्दै अध्यक्ष ओलीले जतिवटा दलको गठबन्धन बने पनि त्यो नेताको मात्र गठबन्धन भएको भन्दै त्यसमा जनता सहभागी नरहेको बताए ।

ओलीले भने– गठबन्धन जो सुकैले गरुन्,एमालेको सरकार बन्छ । किनभने गठबन्धनमा जनता छैनन्, नेतामात्र सामेल छन् । भ्रष्ट नेताहरुको अपराधी गठबन्धनलाई जनताले पराजित गर्नेछन् ।

अध्यक्ष ओलीले राजनीतिक रुपमा नसकेपछि प्रचण्ड–माधवहरुले कम्युनिष्ट पार्टिको सरकार ढाल्न प्रतिक्रियावादीको सहारा लिएर परमादेशमार्फत गठबन्धन बनाएको आरोप लगाए ।

ओली चुनावी तयारीका सिलसिलामा विहीवारदेखि गृहजिल्ला झापाका विभिन्न कार्यक्रममा सहभागी छन् ।