काठमाडौँ । सरकारले ‘विशिष्ट व्यक्तिहरूको सुरक्षा व्यवस्थापन कार्यविधि, २०७७’ परिमार्जन गर्ने भएको छ ।
आइतबार नेपाल सरकार र नेपाल चिकित्सक संघबीच भएको वार्ताका क्रममा विशिष्ट व्यक्तिको सवारीमा सुरक्षा व्यवस्थापन गर्दा बिरामी एवम् आमनागरिक र विशेषगरी स्वास्थ्य संस्थाविद्यालयलगायतका संवेदनशील संस्था तथा क्षेत्रहरुमा असहजता नहुने गरी ‘विशिष्ट व्यक्तिहरूको सुरक्षा व्यवस्थापन कार्यविधि, २०७७’ परिमार्जन गर्ने सहमति भएको हो ।
जसअनुसार एक साताभित्रमा सुझाव पेस गर्ने र उक्त सुझावलाई यथाशीघ्र कार्यान्वयनमा लैजाने सहमतिमा उल्लेख छ । शुक्रवार राष्ट्रपतिको सवारीका क्रममा सडकमा हिँडेको भन्दै राष्ट्रिय ट्रमा सेन्टरका एक चिकित्सक कुटिएपछि संघ आन्दोलित बनेको थियो ।
संघको माग सम्बोधनका क्रममा आइतबार प्रधानमन्त्री तथा मन्त्रिपरिषद्को कार्यालयमा भएको छलफलका क्रममा यो विषयमा पनि सहमति भएको हो।
