काठमाडौं । इंग्लिस क्लब म्यानचेस्टर सिटी च्याम्पियन्स लिग फुटबलको सेमिफाइनलमा प्रवेश गरेको छ ।
क्वाटरफाइनल अन्तर्गत बुधबार राति भएको दोस्रो लेगमा बायर्न म्युनिखसँग १-१ गोलको बराबरी खेलेको सिटी समग्रमा ४-१ को जितसहित अन्तिम चारमा पुगेको हो ।
पहिलो लेगमा सिटीले बायर्नलाई ३-० ले हराएको थियो । बायर्नको मैदानमा भएको दोस्रो लेगमा सुरुआती अग्रता सिटीले बनाएको थियो ।
अर्लिङ हालाण्डले ५७ औं मिनेटमा गोल गर्दै सिटीलाई अग्रता दिलाएका थिए । त्यसअघि ३७ औं मिनेटमा भने हालाण्ड पेनाल्टीमा गोल गर्न चुकेका थिए ।
त्यसपछि खेलको ८३ औं मिनेटमा जोसुवा किमिचले गोल गर्दै बायर्नलाई १-१ गोलको बराबरीमा ल्याएका थिए । तर, उनको गोल बायर्नलाई अर्को चरणमा पुर्याउन प्रयाप्त भएन ।
अब सिटीले सेमिफाइनलमा साविक विजेता रियल मड्रिडसँग प्रतिस्पर्धा गर्नेछ ।
