काठमाडौं । लियोनल मेस्सीले अमेरिकी क्लब इन्टर मियामीसँग औपचारिक सम्झौता गरेका छन् । अर्जेन्टिनी फरवार्डले अमेरिकन एमएलएस क्लबसँग सन् २०२५ सम्म रहने गरि सम्झौता गरेका हुन् ।
सात पटकका बालेन डी ओर विजेता मेस्सीले सिजन सकिएसँगै फ्रेन्च क्लब पेरिस सेन्ट जर्मेन (पीएसजी) छाड्ने निर्णय गरेका थिए । र नयाँ गन्तब्यको रुपमा इन्टर मियामी जाने बताएका थिए ।
‘म इन्टर मियामीबाट अमेरिकामा करियरको अर्को कदम चाल्नका लागि निकै उत्साहीत छु ।’ गत वर्ष अर्जेन्टिनालाई विश्वकप जिताएका मेस्सीले भने ।
मियामीका मालिक डभिड बेकह्यामले मेस्सी अनुबन्धनपछि सपना पुरा भएको प्रतिकृया दिएका छन् । मेस्सीले यसअघि युरोप बाहिर खेलेका थिएनन् ।
‘यो एउटा शानदार अवसर हो । र हामी संगै मिलेर एउटा राम्रो परियोजना निर्माणलाई जारी राख्नेछौं ।’ मेस्सीले थपेका छन् ।
‘हामीले स्थापित गरेका लक्ष्य प्राप्तिका लागि संगै मिलेर काम गर्नेछौं । म यहाँ आफ्नो नयाँ घर सुरु गर्नका लागि निकै उत्साहीत छु ।’ मेस्सीले भनेका छन् ।
मेस्सी जुलाई २१ मा हुने लिग कपको उद्घाटन खेलमा नयाँ क्लबको जर्सीमा देखिनेछन् । मेस्सीले पछिल्लो पटक सन् २०२१ मा विश्वको सर्वोत्कृष्ट फुटबलरको अवार्ड प्राप्त गरेका थिए । गत सिजन कतारमा अर्जेन्टिनालाई विश्वकप जिताएका उनले सो उपलब्धि दोह¥याउन सकिने बताईएको छ ।
उनले पीएसजीमा ७५ खेलमा ३२ गोल गरेका थिए । पछिल्लो सिजन लिग वानमा १६ गोल गरेका थिए भने १६ अवसर सिर्जना गरेका थिए । उनी सन् २०२१ मा फ्रान्स लागेका थिए । स्पेनिस क्लब बार्सिलोनामा २१ वर्ष बिताएका मेस्सीले फ्रान्सलाई नयाँ गन्तब्य बनाएका थिए ।
बार्सिलोनामा मेस्सीले कीर्तिमानी ६ सय ७२ गोल सहित १० लिग उपाधि, चार च्याम्पियन्स लिग र सात स्पेनिस कप जितेका थिए ।
