क्रिस्टियानो रोनाल्डोको दुई गोलको मद्दतले अल–नासरले पहिलोपटक अरब क्लब च्याम्पियन्स कपको उपाधि जित्न सफल भएको छ । एक गोलले पछि परेको स्थिति उल्टाएर अर्को साउदी क्लब अल–हिलाललाई २–१ ले हराउँदै अल–नासरले उपाधि हात पारेको हो ।

पहिलो हाफ गोलविहीन बनेपछि दोस्रो हाफको सुरुवातमा नै अल हिलालले ब्राजिलियन खेलाडी माइकलको गोलमा अग्रता बनायो । तर, ७४ औँ मिनेटमा पोर्चुगिज खेलाडीले सुल्तान अल–घानमको पासमा गोल गर्दै खेल बराबरी गरे ।

यसअघि अब्दुलह अल–अमरीले रातो कार्ड पाएपछि अल–नासर १० खेलाडीमा सीमित बनेको थियो । यसका बावजुद अल–नासरले अल–हिलाललाई अतिरिक्त समयसम्म रोकेको थियो ।

अतिरिक्त समयमा रोनाल्डोले अर्को गोल थप्दै टोलीलाई जीत दिलाए । खेलको अन्त्यतिर भने रोनाल्डो घाइते हुँदै मैदान छाड्न बाध्य भएका थिए ।

गत सिजन रोनाल्डोले अल–नासरसँग उपाधि जित्न असफल भएका थिए । टोली साउदी प्रो लिगमा दोस्रो स्थानमा सीमित भएको थियो । तर, यसपटक ३८ वर्षीय खेलाडीले ६ गोल गर्दै प्रतियोगिताका शीर्ष गोलकर्ता बनेर टोलीलाई उपाधि दिलाउन सफल भएका छन् ।