उत्तर कोरियाका सर्वोच्च नेता किम जोङ उन निकै कठोर शासक मानिन्छन् । तानाशाही शासन चलाइरहेका किमको अन्तर्राष्ट्रिय छवि पनि कठोर र निर्दयी नेताको रुपमा रहेको छ ।

उत्तर कोरियामा मानव अधिकारको अवस्था पनि दयनीय रहेको छ भने त्यहाँ स–सानो अपराध वा गल्तीका लागि पनि कठोर दण्ड दिइन्छ । केही वर्षअघि किममाथि मलेसियाको विमानस्थलमा आफ्नै सौतेनी दाजुको हत्या गराएको आरोप लागेको थियो ।

यति कठोर र निर्दयी नेता किम जोङ उन सार्वजनिक कार्यक्रममा आँशु खसालेको बिरलै देख्न पाइन्छ । सन् २०११ मा आफ्ना पिता किम जोङ इलको निधन भएका बखत उनी डाँको छाडेर रोएका थिए ।

उनी फेरि एक पटक भावुक बनेका छन् । हालै देशका महिलाहरुलाई सम्बोधन गर्दा उनले आफूलाई सम्हाल्न सकेनन् । राजधानी प्योङयाङमा आयोजित आमाहरुको पाचौँ सम्मेलनलाई सम्बोधन गर्दै उनले महिलाहरुलाई धेरैभन्दा धेरै बच्चा जन्माउन आग्रह गरे ।

देशमा जन्मदर घट्दै गइरहेको भन्दै उनले महिलाहरुलाई सकेसम्म धेरै बच्चा जन्माउन र बच्चाहरुलाई कम्युनिष्ट सिद्धान्त सिकाएर हुर्काउन आग्रह गरे । यति भन्दै गर्दा उनी निकै भावुक देखिन्थे ।

‘घट्दो जन्मदरलाई रोक्न र बच्चालाई राम्रोसँग हुर्काउनु हाम्रो पारिवारिक दायित्व हो ।’ यति भन्दै गर्दा उनले आफूलाई रोक्न सकेनन् । र, रुमालले आँशु पुछे ।

एक तथ्यांकअनुसार उत्तर कोरियाको जन्मदर लगातार घट्दो क्रममा छ । सन् २०१४ मा उत्तर कोरियाको जन्मदर १ दशमलब ८८ रहेकोमा सन् २०२२ सम्म आइपुग्दा यो घटेर १ दशमलब ७९ मा झरेको छ ।