मेडिकल व्यवसायी दुर्गा प्रसाईले आफूहरुलाई जिस्काएमा काठमाडौंमा मानिसले भात खान नपाउने गरी नाका ठप्प पारिदिने चेतावनी दिएका छन् । ‘हामीलाई जिस्काउने हो भने काठमाडौंका मान्छेले भात खान पाउँदैनन्,’ भक्तपुरस्थित आफ्नै घरमा पत्रकार सम्मलेन गर्दै बुधबार प्रसाईले भने, ‘ हामीलाई काठमाडौं छिर्न दिएनन् भने काठमाडौंका सबै नाका ठप्प पार्छौं ।’
मंसिर ७ गते काठमाडौंमा विरोध प्रदर्शन गर्ने घोषणा गरेका प्रसाईले त्यसको तयारीबारे जानकारी दिन पत्रकार सम्मेलन गरेका हुन् । आफ्ना समर्थकहरुको हुटिङ र होहल्लाका वीच प्रसाईले भने,‘भोलिदेखि विद्रोहको विरुवा रोपिन्छ । साम्यवाद कस्तो हुन्छ भन्ने म देखाइदिन्छु ।’
मेडिकल व्यवसायी प्रसाईंले एक्लो मानिससँग राज्य हल्लिएको भन्दै गणतन्त्रमा बोल्ने अधिकार सबैको भएको बताए । पृथ्वीनारायण शाहले बनाएको जग भत्काएकाले गणतन्त्र हल्लिएको भन्दै अब यो व्यवस्था अन्त्य नभएसम्म घर नफर्किने उदघोष गरे । कि जेल जाने कि मर्ने कसम खाएर आफू काठमाडौँ आएको प्रसाईंको भनाइ छ ।
काठमाडौंको कार्यक्रममा सहभागी हुन आएका महिला महिला बसेको ठाउँमा युवासंघका कार्यकर्ताले हातपात गर्न खोजेको उनले आरोप लगाए । उनले महिलामाथि अत्याचार गर्दासमेत महिला अधिकारकर्मी र राज्यप्रसाशन मौन भएकोमा आपत्ति समेत जनाए ।
ओली र बस्नेतलाई चेतावनी दिँदै उनले मित्रवत् व्यवहार गर्दा राम्रो हुने तर दुस्मनी गर्दा ठुलो मूल्य चुकाउनुपर्ने चेतावनी दिए । विहीबार राजधानीमा कार्यक्रमको घोषणा गरेका प्रसाईले पत्रकार सम्मलेनमा कार्यक्रमको स्थानबकारे भने स्पष्ट बताउन सकेनन् । उनले भने,‘बल्खुमा पनि हुन सक्छ, झापामा पनि हुन सक्छ । यसको सेड्युल आउँछ ।’
यसअघि प्रसाईले रत्नपार्कमा कार्यक्रम हुने बताएका थिए । तर, महेश बस्नेत नेतृत्वको युवा संघले तीनकुनेमा कार्यक्रम गर्ने भएपछि बल्खुमा कार्यक्रम हुन सक्ने उनले बताएका हुन् ।
गणतन्त्रको विरोधमा राजतन्त्र फर्काउने वकालत गर्दै आएका प्रसाईले बैंक र वित्तीय संस्थाको विरोधलाई आफ्नो रणनीति बनाएका छन् ।
