काबुल– अफगानिस्तानमा भारी वर्षाले निम्त्याएको आकस्मिक बाढीका कारण कम्तीमा १३ जनाको मृत्यु हुनुका साथै अन्य १६ जना घाइते भएको त्यहाँको राष्ट्रिय विपद् व्यवस्थापनका अधिकारीले बताएका छन् ।
विगत १० दिनदेखि परेको भारी वर्षाले गजनी, लघमान, नङ्गरहार, फराह, पक्तिया, बदघिस, हेरात र दयाकुन्डी प्रान्तमा आकस्मिक बाढी ल्याएको राष्ट्रिय विपद् व्यवस्थापनका प्रवक्ता मुल्लाह जनान स्याकले बताएका छन् ।
स्याकका अनुसार बाढीले अन्य प्रान्तहरूमा पनि ठूलो मात्रामा सम्पत्ति क्षति पुर्याउदा १०९ वटा आवासीय घर पूर्ण वा आंशिक रूपमा ध्वस्त भएका छन् भने लगभग ६५० हेक्टर खेतीयोग्य जमिन बगाएको छ । गत मेदेखि परेको निरन्तरको वर्षाले गर्दा भएका दुर्घटनाहरूमा ४०० भन्दा बढीको मृत्यु हुनुका साथै सयौं घाइते भएका छन् । साथै बाढीले ठूलो आर्थिक क्षतिसमेत पुर्याएको छ ।
