बेलायतका चर्चित पत्रकार तथा लेखक टम बर्जिजले यसै साता नयाँ पुस्तक प्रकाशित गरेका छन् । पुस्तक २२० पृष्ठ मोटो छ । ‘कुकुल्याण्ड’ नामक पुस्तकको ५७ देखि ७५ पृष्ठसम्म अर्थात १८ पृष्ठ नेपालको विषयमा चर्चा छ । पुस्तकको उपशीर्षक छ– जहाँ धनीहरू सत्यको मालिक हुन्छन् ।
पुस्तकमा नेपालका नवधनाढ्य व्यवसायी अजेयराज सुमार्गीले कसरी एनसेलसँग जोडिएको टेलियासोनेराका बेलायती बिचौलिया मोहम्मद अमेर्सीसँग प्रचण्डको सेटिङ मिलाए भन्ने वर्णन गरिएको छ ।
टम बर्जिजको पुस्तकमा टेलिकमका बिचौलिया मोहम्मद अमेर्सीको ‘नेपाल कनेक्सन’ बारे चर्चा गरिएको छ । नेपालमा टेलियासोनेराले प्रचण्ड र उनका मन्त्रीहरुसँगको पहुँचका लागि अजेय सुमार्गीलाई जति पनि खर्च गर्न तयार बनेको दाबी गरिएको छ ।
सुमार्गीकी सालीका नाममा किनिएको लाजिम्पाटको घरमा प्रचण्ड बसेको र प्रचण्डको सम्पत्तिसमेत सुमार्गीले आफ्नो नाममा गराएका जस्ता प्रशंगहरु टमको पुस्तकमा उल्लेख गरिएका छन् ।
राजा ज्ञानेन्द्रले सत्ता हातमा लिएपछि उनका ज्वाइँ राजबहादुर सिंहमार्फत सुमार्गीले टेलिकमका बिचौलियाहरुसँग सम्पर्क बनाएको र पछि माओवादी सत्तामा आएपछि प्रचण्ड र कृष्णबहादुर महरालाई हातमा लिन सफल भएको पुस्तकमा उल्लेख छ ।
कृष्णबहादुर महराले सुमार्गीलाई हेल्लो नेपालको लाइसेन्स दिएको र पछि बेलायती बिचौलिया मोहम्मद अमेर्सीसँग सुमार्गीले प्रचण्डको भेटसमेत गराएको बेलायती पत्रकार टमको दाबी छ ।
यो पुस्तकले नेपालका प्रधानमन्त्री पुष्पकमल दाहालको बेइज्यत गरेको छ । खोजी पत्रकारितामा विश्व चर्चित लेखक टमले आफ्नो पछिल्लो किताबमा यसरी नेपालका प्रधानमन्त्री प्रचण्डलाई नामूद बिचौलियासँग कनेक्सन गराएपछि प्रचण्डको मात्र नभएर सिंगै नेपालको अन्तरराष्ट्रिय छविमा असर पर्ने देखिएको छ ।
फाइनान्सिलय टाइम्सका पूर्वपत्रकार टम बर्जिज ‘ल लुटिङ मेसिन’ र ‘क्लिप्टोपिया’ जस्ता विश्वचर्चित किताबका लेखक हुन् । उनका यी पुस्तक ‘बेस्टसेलिङ’को सूचीमा परेका छन् ।
