काठमाडौं- अहलेकी चर्चित रक गायिका एवम् भ्वाइस अफ नेपालकी पूर्वनिर्णायक अभया सुब्बाले क्रिकेटर सन्दीप लामिछानेबारे आलोचनात्मक टिप्पणी गर्दा सामाजिक सञ्जालमा चर्को गाली खानु परेको छ ।
युवती बलात्कार अभियोगमा उच्च अदालत पाटनबाट सफाइ पाएका सन्दीपबारे उनले बिहीबार सामाजिक सञ्जाल फेसबुकमा एउटा टिप्पणी लेखेकी थिइन् । जसमा उनले सन्दीपको घुमाउरो आलोचना गर्दै उनलाई समर्थन गर्नेहरूले आफूलाई फेसबुकबाट अनफ्रेन्ड गरे हुने सन्देश छाडेकी थिइन् ।
अमेरिकाले भिसा नदिएका कारण तनावमा रहेका सन्दीपबारे अभयाले तिखो टिप्पणी गर्दै अनफ्रेन्ड गर्न भनेपछि समर्थकहरू उनीविरूद्ध खनिएका छन् । यही जेठ २ गते उच्च अदालत पाटनले बलात्कार मुद्दामा सफाइ पाइसकेका सन्दीपबारे ढिलो गरी अभयाले आफ्नो भनाइ सार्वजनिक गरेकी थिइन् । अदालतले सफाइ दिए पनि उनलाई यौन हिंसामा संलग्न व्यक्तिका रुपमा हेर्नुपर्ने आशयसहित अभयाले फेसबुकमा लेखेपछि सन्दीपका फ्यान तातिएका हुन् ।
