अधिवक्ता दीपेन्द्र झाले कान्तिपुर मिडिया ग्रुपका अध्यक्ष कैलाश सिरोहियाविरुद्ध लगाइएको नागरिकतासम्बन्धी मुद्दामा कुनै दम नभएको बताएका छन् । शुक्रबार जिल्ला अदालत धनुषाका न्यायाधीश रोमाकान्त ज्ञवालीको इजलासमा सिरोहियाको मुद्दामा बहस गरेर बाहिरिने क्रममा उनले यस्तो दाबी गरेका हुन् । मधेश प्रदेशका पूर्व मुख्य न्यायाधिवक्तासमेत रहेका झाले सरकारले सिरोहियाविरुद्ध दुराशयपूर्ण रुपमा मुद्दा चलाएको पनि बताए ।
‘सिरोहियाविरुद्ध दुरासयपूर्ण रुपमा मुद्दा चलाएको छ, यो मुद्दा टिक्दैन । उहाँ छुट्नु हु्न्छ’, उनले खबरहबसँग अदालत परिसरमा कुरा गर्दै भने ।
उनले सिरोहियासँग दुईवटा नागरिकता हुनु राज्य र त्यसका निकायको गल्ती भएको पनि बताए । ‘कैलाश सिरोहियासँग दुईवटा नागरिकता हुनु राज्यको गल्ती हो’, उनले भने, ‘उहाँको नाममा पहिले नै जारी भएको नागरिकताको नम्बर राखेर अर्कालाई पनि नागरिकता दिइएको छ । यो उहाँको होइन, राज्यको गल्ती हो ।’ उनले सिरोहियाको नागरिकता नम्बरमा २०८० पुस २० गते अर्को व्यक्तिलाई जिल्ला प्रशासन कार्यालय धनुषाले नागरिकता दिएको दाबी पनि गरेका छन् । अदालतमा उनीसहित सिरोहियाको पक्षमा ७ भन्दा बढी वकिलले बहस गरे । सिरोहियाको पक्षमा वरिष्ठ अधिवक्ता शम्भु थापा, अधिवक्ता झा, वरिष्ठ अधिवक्ताहरू सीताराम भट्टराई, शेरबहादुर केसी, रमन श्रेष्ठ, गोविन्द बन्दी र रमण कर्णसहितले बहस गरे । अब न्यायाधीश ज्ञवालीको इजालसले म्याद थपेर अनुसन्धान गर्न दिने या बाहिरै राखेर प्रक्रिया अघि बढाउनेबारे आदेश दिने छन् ।
