इस्लामावाद— साउदी अरबका युवराज मोहम्मद बिन सलमान अल साउदको बहुप्रतिक्षित पाकिस्तान भ्रमण फेरि स्थगित भएको छ। उनले मे १९ मा पाकिस्तानको भ्रमण गर्ने तय भएको थियो ।
पाकिस्तान सरकारले उक्त भ्रमणको लागि तयारी गरिरहेको छ । साउदी राजकुमार पाकिस्तानको राजनीतिक घटनाक्रमबाट धेरै चिन्तित देखिएका छन् । पछिल्लो समय देशको आन्तरिक मामिलामा साउदी अरेबियाको संग्लनता बारेमा बहस हुन थालेको छ ।
हालै पाकिस्तान तहरीक—ए—इन्साफ (पीटीआई) का नेता शेर अफजल मारवतले सार्वजनिक लेखा समितिको अध्यक्ष पदका लागि आफूलाई विचार नगर्नुको पछाडि साउदी प्रभाव रहेको बताएका थिए ।
गत महिना, मारवतले साउदी अरेबियाले इमरान खानको सरकारलाई हटाउनको लागि संयुक्त राज्यले गरेको शासन परिवर्तनको खेलमा सहभागी भएको दाबी गरेका थिए ।
अर्कोतर्फ, सरकारी स्रोतहरूले राजकुमारको पाकिस्तान भ्रमणलाई अन्तिम रूप दिनु अघि आर्थिक मोर्चामा केही बुँदाहरू छन् जुन दुबै पक्षहरू बीच स्पष्ट हुन आवश्यक रहेको बताउँछन्।
हालै पाकिस्तान भ्रमण गरेका साउदी लगानीकर्ता र व्यवसायीले केही आयोजनामा चासो राखेको तर सम्झौताको सर्त भने टुङ्गो नलागेको बताइएको छ।
पाकिस्तानको परराष्ट्र मन्त्रालयका प्रवक्ताले भ्रमणको परिमार्जित कार्यतालिकामा अझै काम भइरहेको बताए पनि स्रोतका अनुसार राजकुमारले हज र इद उल अधाको बिदाको लगत्तै जुनको तेस्रो साता पाकिस्तान भ्रमण गर्न सक्ने सम्भावना रहेको छ ।
