संयुक्त राष्ट्र सङ्घको सुरक्षा परिषद्ले इजरायल–गाजा युद्धविराम प्रस्ताव पारित गरेपछि प्यालेस्टिनी विद्रोही समूह हमासले जवाफ दिएको छ ।अमेरिकाले अघि सारेको युद्धविरामको प्रस्तावमा हमासले यो युद्धविराम स्थायी होस् भन्ने इजरायलको प्रतिबद्धता चाहेको बताएको बीबीसीले जनाएको छ । हमास र उसको सहयोगी प्यालेस्टिनी इस्लामिक जिहाद पीआईजे०ले यो युद्ध अन्त्य गर्ने सहमतिमा पुग्न सकारात्मक वार्ता गर्न तयार रहेको बताएका खबरमा उल्लेख छ । प्रस्तावमा शुरुवातको छ हप्तासम्म युद्धविराम गर्ने र दोस्रो चरणमा युद्धविराम स्थायी गरिने उल्लेख छ । यसका साथै गाजामा पुनर्निर्माणको काम शुरु गरिने पनि उल्लेख छ । ह्वाइट हाउसका राष्ट्रिय सुरक्षा प्रवक्ता जोन किर्बीले हमासको जवाफले युद्ध रोक्न सहयोग पुग्ने र अमेरिकी अधिकारीहरूले त्यो जवाफको मूल्याङ्कन गरिरहेको बताउनुभएको छ । हमासको स्वास्थ्य मन्त्रालयका अनुसार गएको अक्टोबर ७ मा युद्ध शुरु भएदेखि त्यहाँ अहिलेसम्म ३७ हजार जनाभन्दा धेरै मानिसको ज्यान गएको छ ।