काठमाडौं । इन्जुरी समयमा लुइस स्वारेज चम्किँदा क्यानडाविरुद्ध टाइब्रेकरमा जित निकाल्दै कोपा अमेरिका–२०२४ मा उरुग्वेले तेस्रो स्थान हासिल गरेको छ ।

आइतबार बिहान अमेरिकाको बैंक अफ अमेरिका रंगशालामा भएको खेलमा उरुग्वे इन्जुरी समयसम्म २–१ ले पछि थियो । तर, इन्जुरी समयको दोस्रो मिनेटमा स्वारेजले गोल गरेपछि उरुग्वे खेलमा फर्कियो । यसपछि थप गोल हुन नसक्दा नतिजाको निर्णय पेनाल्टी सुटआउटबाट भएको हो ।

पेनाल्टीमा उरुग्वेका चारमध्ये चार खेलाडीले नै गोल गर्न सफल रहे । उरुग्वेका लुइस स्वारेज, फेडेरिको भाल्भार्डे, रोड्रिगो बेन्टानकुर र जर्जियन डे अरास्केटाले गोल गरे । क्यानडाबाट भने पाँचमध्ये तीन खेलाडीले मात्र गोल गर्न सफल रहे । क्यानडाका जोनाथन डेविड, मोइस बोम्बिटो र माथ्यु सोइनियरले गोल गरे । इस्माल कोन र अल्फान्सो डेविसको प्रहारले भने जाली चुम्न सकेन ।

त्यसअघि खेलको आठौँ मिनेटमा राड्रिगो बेन्टानकुरले गोल गर्दै उरुग्वेलाई अग्रतामा राखेका थिए । तर, मार्सेलो वियल्साको प्रशिक्षणमा रहेको उरुग्वेको यो अग्रता लामो समय टिक्न भने सकेन । २२औँ मिनेटमा इस्माल कोनले गोल गर्दै क्यानडालाई खेलमा फर्काएका थिए । ८०औँ मिनेटमा जोनाथन डेविडले गोल गर्दै क्यानडालाई २–१ को अग्रतामा राखेका थिए । तर, इन्जुरी समयमा स्वारेजको गोलमा उरुग्वे खेलमा फर्किएको थियो ।

प्रतियोगिताको सेमिफाइनलमा उरुग्वेले कोलम्बियासँग १–० को हार बेहोरेको थियो । क्यानडा भने साविक विजेता अर्जेन्टिनासँग २–० ले पराजित भएको थियो । पहिलोपटक कोपा अमेरिका खेलिरहेको क्यानडाले डेब्युमै सेमिफाइनलसम्मको यात्रा तय गरेको हो । प्रतियोगिताका उपाधिका निम्ति सोमबार बिहान अर्जेन्टिना र कोलम्बिया भिड्दै छन् ।