वासिङ्टन- अमेरिकाका पूर्व राष्ट्रपति डोनाल्ड ट्रम्प आफूमाथि भएको हमलापछि पहिलो पटक सार्वजनिक कार्यक्रममा देखिएका छन् ।
आइतबार भएको हमलापछि पहिलो पटक सार्वजनिक रुपमा देखिएका उनको कानमा पट्टी बाँधिएको छ ।रिपब्लिकन पार्टीको राष्ट्रिय सम्मेलनका लागि मिलवाऊकी पुगेका ट्रम्प प्रसन्न देखिन्थे ।उनको दाहिने कानमा ठूलो सेतो रंगको पट्टी देखिएको छ । उनको कानलाई छुँदै गोली निस्किएको थियो ।
पार्टीको सम्मेलनमा उनीसँगै उपराष्ट्रपति पदका रिपब्लिकन उम्मेदवार जेडी वेन्स पनि देखिए । पार्टीका सिनेटर बेरन डोनाल्ड्स दाहिनेतिर उभिएका थिए । उनीसँगै बक्समा छोरा एरिक र डोनाल्ड जुनियर पनि थिए । त्यहाँ उनको परिवारका अरु सदस्य पनि देखिए ।
राष्ट्रिय सम्मेलनमा वक्ताहरूले भाषण गर्दै ट्रम्प मुस्कुराएको देखिए । उनी बीच-बीचमा ताली बजाइरहेका थिए । ट्रम्प वेन्स र डोनाल्ड्सतर्फ फर्किएर भाषणमा टिप्पणी गरेको देखिए । आइतबार पेन्स्लिभेनियाको बटलरमा रिपब्लिकन पार्टीको चुनावी र्यालीमा ट्रम्प भाषण दिइरहेका थिए। त्यही बेला उनलाई निशाना लगाएर एकजना २० वर्षीय युवाले गोली हानेका थिए । गोलीबाट ट्रम्प मुस्किलले जोगिएका थिए ।
गोली उनको दाहिने कानलाई छुँदै निस्किएको थियो । हमलामा संलग्न म्याथ्यु थोमस क्रुक्सलाई पुलिसले तत्कालै गोली हानेर मारिदिएको थियो ।
