काठमाडौँ । युवामा नवप्रवर्तन र उद्यमशीलता प्रोत्साहन गर्ने उद्देश्यले आयोजना गरिएको राष्ट्रिय युवा कृषि नवप्रवर्तन प्रतियोगिता २०८१ सम्पन्न भएको छ ।
युथ इनोभेसन ल्यावले संयुक्त राष्ट्रसंघीय विकास कार्यक्रम (यूएनडिपी) र संयुक्त राष्ट्र संघको खाद्य तथा कृषि संगठन (एफएओ) सँगको सहकार्यमा आयोजना गरेको उक्त कार्यक्रममा नेपालका सातवटै प्रदेशका युवा उद्यमीको सहभागिता रहेको थियो । युवा कृषि उद्यमीलाई कृषि र खाद्य प्रणालीमा महत्त्वपूर्ण योगदान पुर्याउन सहयोग गर्ने उद्देश्यका साथ आयोजित बुटक्याम्प तीन दिनसम्म सञ्चालन भएको थियो ।
युवा कृषि नवप्रवर्तन प्रतियोगिताका लागि कूल ५८ आवेदनहरू मध्ये २१ कृषिमा आधारित स्टार्टअप प्रतिनिधित्व गर्दै ३८ उद्यमीहरूको सक्रिय सहभागिता रहेको थियो । यी सहभागीले कृषि तथा प्रविधि, खाद्य प्रणालीदेखि व्यवसाय योजना र अन्य महत्वपूर्ण सवालमा छलफल गरेका थिए । प्रतियोगितामा नेपालका सातै प्रदेशका १८ देखि ३० उमेर समूहका युवा नवप्रवर्तक एकै ठाउँमा भेला हुँदै कृषि, जैविक मल, कृषि-प्रविधि र नेपाली मौलिक उत्पादनसँग जोडिएका नवप्रवर्तनहरू प्रर्दशनीमा राखिएको थियो ।
उक्त अवसरमा संसद सोबिता गौतमले युवा ऊर्जाले नवप्रवर्तन र परिवर्तनमा ल्याउन महत्त्वपूर्ण भूमिका खेल्न सक्ने कुरमा जोड दिइन् । उनले कृषि क्षेत्रमा व्याप्त समस्यालाई नवप्रवर्तनकारी समाधान मार्फत अन्त्य गर्न सकिने बताइन् ।नेपाल र भुटानका लागि एफएओ प्रतिनिधि केन सिमिजुले सबै नवीनतम सोचका युवाहरूलाई बधाई दिदैँ कृषि उत्पादनको क्षेत्रको रुपान्तरण गर्न अथक मेहेनत गर्न अवश्यक रहेको र त्यसमा एफ ए ओ को प्राविधिक सहयोग सदैव रहने जानकारी गराए ।
युएनडिपी नेपालका आवासीय प्रतिनिधि आइसानी मेदांगोदा-लाबेले युवामा लगानी बढाउनु पर्ने आवश्यकतालाई महत्व दिदैँ युवालाई असफल हुने चिन्ताबाट बाहिर निस्कन आग्रह गर्नुका साथै नयाँ सोच विचारमा केन्द्रित रहन् प्रोत्साहन गरे । युथ इनोवेशन ल्यावका कार्यकारी निर्देशक प्रदीप खतिवडाले बुटक्याम्पमा आफ्नो समय र प्रयास समर्पित गर्ने युवा उद्यमीको प्रशंसा गदै कृषि क्षेत्रमा थप युवा संलग्न हुनुपर्ने खाँचोमा जोड दिए ।
कार्यक्रममा ५८ मध्ये सबैभन्दा नवप्रवर्तक र विस्तारयोग्य तीन स्टार्टअपलाई जनही एक लाख रुपैयाँ अनुदान हस्तान्तरण गरिएको थियो । विजेता स्टार्टअपहरू सतत्व फूड प्रोडक्ट्स, टावरगानिक्स नेपाल र ज्योति हेल्थी स्न्याक्स् रहेका छन् । यी तीन संस्थाहरू अन्तिम आठ समूहमा छनौट भएका स्टार्टअपहरूले गरेको प्रस्तुतिको आधारमा छनौट भएका थिए ।छनौटकर्तामा पहाडी फुड्सका सह–संस्थापक सञ्जय काफ्ले, खेतिपतिका संस्थापक प्रकृति गौतम, एफएओ नेपालका कार्यक्रम विशेषज्ञ अरुण जीसी र यूएनडिपी नेपालका कार्यक्रम प्रबन्धक (वातावरण तथा अनुकुलता) प्रज्ञाजन यलम्बर राई रहेका थिए ।
