![बाँकेमा एक वर्षमा ६३ सर्पको उद्धार](https://sagarmatha.tv/wp-content/uploads/2024/07/main-qimg-51b5b4179706c5b10ba619bdc24af1c8.webp)
डिभिजन वन कार्यालय बाँकेले गत आर्थिक वर्ष २०८० र ८१ मा ९९ वन्यजन्तुको उद्धार गरेको छ । एक वर्षको अवधिमा सबैभन्दा धेरै ६३ सर्पको उद्धार गरिएको डिभिजन वन कार्यालय बाँकेका सूचना अधिकारी वीरेन्द्रकुमार रोकाले जानकारी दिए ।
उनका अनुसार एक वर्षको अवधिमा गोहोरो पाँच, अजिङ्गर १३, बाँदर तीन, मगर गोही एक, जरायो एक, चित्तल आठ, निर बिरालो तीन, डगर गिद्ध एक र निलगाई एक उद्धार गरिएको छ ।
डिभिजन वन कार्यालयले अघिल्लो आव वर्ष २०७९ र ८० भन्दा आव २०८०र ८१मा ५७ बढी वन्यजन्तुको उद्धार गरेको छ । आव २०७९ र ८० मा ४२ वन्यजन्तुको उद्धार भएको थियो । यसैगरी आव २०७८ र ७९ मा ३१, आव २०७७ र ७८ मा ३४ र आव २०७६ र ७७ मा १७ वन्यजन्तुको उद्धार भएको सूचना अधिकारी रोकाले जानकारी दिए ।
गत आवमा वन्यजन्तुबाट भेडाबाख्रा ६९, गाईगोरुरभैँसी नौ, बङ्गुर सात, माछा दुई हजार, हाँस १२ र कुखुरा १० क्षति पुगेको छ । बाँके राष्ट्रिय निकुञ्ज तथा सो को मध्यवर्ती क्षेत्र बाहेक जिल्लाका सम्पुर्ण भू–भाग डिभिजन वन कार्यालयको कार्यक्षेत्रभित्र पर्दछ ।
उक्त क्षेत्रभित्र रहेका राष्ट्रिय वन, सामुदायिक वनको संरक्षण, व्यवस्थापन, सदुपयोग तथा वन्यजन्तुको संरक्षण लगायत स्थानीय जनतालाई निजी वन स्थापना र विकास गर्न सहयोग पुग्ने कार्य गर्दै आएको डिभिजन वन कार्यालय बाँकेका डिभिजनल वन अधिकृत अजितकुमार कर्णले जानकारी दिए ।