वाशिङटन डीसी । इजरायलका प्रधानमन्त्री बेन्जामिन नेतान्याहु यतिबेला अमेरिका भ्रमणमा छन् । सोही क्रममा उनले अमेरिकी राष्ट्रपति जो बाइडेनसँग भेटवार्ता गरेका छन् ।

यसअघि नेतन्याहुले अमेरिकी कांग्रेसको संयुक्त बैठकलाई पनि सम्बोधन गरेका थिए । बाइडेन र नेतन्याहुले एक अर्कालाई भेटेर गाजा युद्धविराम सम्झौताका सम्बन्धमा दुई पक्षबिचको मतभेदलाई समाधान गर्ने विषयमा कुराकानी गरेको ह्वाइट हाउसले बताएको छ । अमेरिकी कांग्रेसलाई सम्बोधन गरेपछि नेतन्याहुले बाइडेनलाई भेटेका थिए ।

नेतन्याहुले संसद्लाई सम्बोधन गरिरहँदा हजारौँ प्यालेस्टिनी समर्थकहरूले संसद् भवन बाहिर विरोध प्रदर्शन गरेका थिए । अमेरिकी उपराष्ट्रपति कमला ह्यारिसले पनि नेतन्याहुलाई भेटेकी छिन् । ह्यारिसले गाजामा भइरहेको मृत्युप्रति गम्भीर चिन्ता व्यक्त गरेकी थिइन् । आगामी महिनाहरूमा वर्तमान मुद्दाहरूमा राष्ट्रपति बाइडेनसँग काम गर्न आतुर रहेको नेतन्याहुले बताएका छन् । गाजा युद्ध सुरु भएको ९ महिना भइसकेको छ । युद्ध अन्त्य गर्न अन्तर्राष्ट्रिय र राष्ट्रिय स्तरमा नेतन्याहुमाथि धेरै दबाब आइरहेको छ ।